Shillong, Risaw 17 : Ka NorthEast United FC ka la soi ïa ka soskular lane ka Memorandum of Understanding (MoU) kaba lai snem bad ka Sorkar Meghalaya ban pynsted ïa ka jingpynroi ïa ka jingïalehkai phutbol ha kane ka thaiñ bad ban buh ïa ka nongbah Shillong kum ka Nongbah jong ka jingïalehkai phutbol (Football Capital) jong ka Ri India.
Kane ka jingïatehlok, kaba sdang naduh u snem 2025 haduh u snem 2028, ka wanrah ïa ka jingïatylli lang jong ka NorthEast United FC, ka tnad jngohkai pyrthei, ka sorkar Meghalaya, bad ka tnad ïalehkai ka sorkar jylla Meghalaya, ha ka jingpyrshang ban kyntiew ïa ka kolshor phutbol kum kawei, ban pynshlur ïa ka jingïashim bynta jong ki samla, kumjuh ruh ban pynskhem ïa ka Meghalaya kum ka jaka jngohkai pyrthei ba pawnam jong ka India.
Hapoh kane ka MoU, ki kynhun kin ïatreilang ban treikam ïa ki jingthmu bapher bapher, kynthup ïa ki jingïalehkai phutbol, ki prokram ai jinghikai na bynta ki coach, ki fan park lane ki jaka ba ïalum lang ki nongkyrshan, bad ki prokram pynsngewthuh ïa ki samla kiba thmu ban pynroi ïa ki sap ba buhrieh jong ki bad ban pynkhlaiñ ïa ka jingïadei jong ki nongkyrshan.
Halor kane ka jingïatehlok, na ka liang jong u Myntri Rangbah ka Jylla, u Conrad Sangmau la ong, “Kane ka jingïatreilang ka ban neh slem kan ïarap ïa ki samla Meghalaya ban ïoh ïa ki lad ki lynti kiba thymmai ha ka phutbol, ban kyntiew ïa ka kam jngohkai pyrthei, bad ban ai kam ai jam ha ka Jylla”.
Kumjuh ruh na ka liang jong u John Abraham, trai jong ka NEUFC, u la pynpaw ba, “Ka sorkar Meghalaya ka la long ka nongkyrshan ba radbah jong ka NorthEast United FC. Kane ka jingïatreilang ka pyni ïa ka por kaba kongsan ha ka jingthmu ba jngai jong ngi ban kyntiew ïaka phutbol ha kylleng ka thaiñ Shatei Lammihngi bad ban wanrah ïa ka jingktah kaba don jingmut ha ka jingim jong ki briew”.
“Kane ka dei ka por kaba kongsan ha ka jingïaid lynti jong ngi bad ka Sorkar Meghalaya, kaba la long ka nongkyrshan kaba kongsan ha ka jingroi jong ngi. Ka Residential Academy – Centre of Excellence jong ngi, ka ban wan ha Shillong, kan long kum ka sienjam ban kyntiew ïa ka phutbol ha ka Jylla Meghalaya, ïa ka thaiñ Shatei Lammihngi, bad ka phutbol ha India hi baroh kawei,” la pynpaw u Mandar Tamhane, CEO ka NorthEast United FC.
