Soi ka Shillong Lajong ïa u El Hadji Abdou Karim Samb na ka bynta ka samoi 2023-24 jong ka I-League

Shillong, Nailur 05 : Ka kynhun ïalehkai jong ka Shillong Lajong Football Club ka la ïoh ban pynbna ba ka ladep ban soi ïa u El Hadji Abdou Karim Samb, u rangïalehkai bynta ba shakhmat ba dang 27-snem u ba na Dakar, Senegal, na ka bynta ka samoi lehkai snem 2023-24 jong ka I-League.
Kane ka jingwanpoi u Karim bad kane ka kynhun kan sa nang pynkhlaiñ shuh ïa ka klob ha kane ka kynti ba mynta, khamtam haba ïadei bad ki bynta ba shakhmat.
U Karim Samb u la lah ban ïalehkaibha bad pynshohbiej ruh ïa katto katne ki ri, kiba kynthup ïa ka Turkey, Beirut, Morocco, Lebanon, bad Libya. Ka jingtbit bad jinglenlade jong u ne u rangïalehkai na ka bynta kane ka sport ka la pynlong ïa u, kum u wei na ki rangïalehkai ban shah peitkhmat ha rynsan ïalehkai football ka pyrthei.
U Karim Samb u la don bynta ruh ban ïalam ïa ka ASC Jaraaf (ka klob na Senegal), sha ka burom ha ka lympung snem 2016 jong ka First Division League ha Senegal. U la ïoh ruh ban khur ïa ka nam Best Player Award ha kane ka lympung, hadien ba u la lah ban ïalehkai bha.
Ha u snem 2017, u ne u rangïalehkai na Senegal, sa shi sien u la pynpaw biang ïa ka sap ka jong u da kaba ïarap ïa ka kynhun Jarraf FC ban rah biang ïa ka 1st division championship, bad u la wan ha ka thup ba ar napdeng ki rangïalehkai ba ïoh thep bun kol tam, kaba la nangkyntiew shuh shuh ïa ka nam jong u ha ka phutbol.
Kane ka jing pyndep jong ka Shillong Lajong FC ban soi ïa u Karim Samb, ka dei ruh ka sien kaba ar na ka bynta ka klob ban soi rangïalehkai bar ri ban pynkhreh na ka bynta kane ka samoi ban wan, hadien ka jingwanpoi u player ri Brazil, u Daniel Goncalves.
Na ka liang jong ka klob, ka don ïa ka jingthmu ban pynkhlaiñ ïa ka kynhun da kaba wanrah ïa kine ki player ba kynsai na shabar, bad ruh ban ïalehkaibha ha kane ka I-League samoi 2023-24 ka ban sa sdang shen.