Shillong, Risaw 29: U Myntri Rangbah ka Jylla Conrad K Sangma ha ka sngi Ba-ar u la hiar sha Pynursla ryngkat bad u MLA ka thain ba dei ruh u Symbud Myntri Rangbah ka Jylla Bah Prestone Tynsong ban snohkti lang ha ka jingrakhe ïa ka Jubili Rupa jong ka skul St. Anthony’s Higher Secondary, Pynursla.
Na ka liang u Myntri Rangbah haba kren kum u Kongsan ha kane ka sngi u la ai nam ïa ki Balang kiba la noh synniang haduh katta katta na ka bynta ban kyntiew ïa ka pule puthi ha ka jylla. U la ai nam ruh ïa ki Phadar kiba la poi naduh ki 70 snem mynshwa ban wan seng skul ha ka thaiñ Pynursla.
Kumban shu kdew hangne ïa ka skul St. Anthony’s Pynursla la seng ha ki snem 1957 da u Fr. E Usai bad dei haduh u snem 2000 ba ki bor pynïaid jong ka skul ki la rai ban kyntiew kyrdan noh sha ka Higher Secondary.
U Myntri Rangbah u la pynbna ruh ba un ai haduh 35 lak tyngka na ka bynta ban pynbeit pynbiang shuh shuh ïa ka jingdonkam jong ka skul. U la kular ruh ba un pynrung ruh ïa ka St. Anthony’s Higher Secondary Pynursla ha ka thup jong ki jaka pule ban ïoh shuh ïa ka song jingïarap na ka bynta ki jingdonkam ba bun.
Na ka liang u Symbud Myntri Rangbah u la Ïaroh ruh ïa ka Balang kaba la sdang ïa ka college ha katei ka Parish. Halor kane ruh u la kular ai ka jingïatreilang ryngkat ryngkat na ka bynta ka jingmyntoi jong ki samla pule ka thain.
U la ong ruh ki sngew sarong ba ka St. Anthony’s ka dei ka higher secondary kaba nyngkong eh ha ka thaiñ Pynursla bad riwar baroh kawei.
La donlang ruh ha kane ka sngi naduh u Myntri ka tnad Arts and Culture ka sorkar jylla Bah Sanbor Shullai, ka MDC jong ka Nongshken Kong Grace Kharpuri, SDO ka Pynursla Civil Sub Division Kong E Warjri, ki heh pulit ki heh sorkar nalor ki khynnah skul barim.
Hadien kane ka la don ruh ka jingpynkup burom ïa ki Phadar, ki Sister bad ki riewrangbah kiba long ki radbah ha ka jingseng ïa kane ka jaka pule.
Shwa kane la ïoh ruh ïa ka jingkren na u Secretary ka Managing Committee, Fr. Lucas Thongni bad ruh na ka Headmistress Sr. Theresa Nongsiej nalor kiwei kiwei.
Ka prokram ka la shongshit ruh da ki prokram ba harukom kynthup ïa ka skit ba lyngkot kaba pyni ïa ka jingïaid lynti jong ka skul naduh ka por ba seng ïa ka haduh ki snem ba ki seng ïa ka higher secondary bad haduh kumba long mynta. Nangta la ïoh ruh ki nongshad ki jingrwai bad kiwei kiwei ki prokram kiba la pynphuh shuh shuh ïa ka jingpynhap pyrda ïa kane ka Jubili Rupa.
