Sngewsih jur u bah Kyrmen Rymbai halor ka jingshah buh dur lang bad ki nongpyniap briew bad pynsaphriang lyngba ki Facebook
Khliehriat Nailar 26: U bah Kyrmen Rymbai uba na ka shnong Rymbai East Jaiñtia Hills District u pynpaw ka jingsngew sih kaba khraw halor ka jingshah buh ïa ka dur jong u lem bad ki saw ngut ki nongpyniap briew ba la pynsaphriang ruh lyngba ki Facebook, u la byrngem ba un leit ujor da ka ejahar pyrshah ïa kito kiba pynsaphriang ïa ka dur jong u ba la tah lang bad ki nongpyniap briew.
Ha ka jingshisha, ki saw ngut ki runar nongpyniap kiba la shah kem ki dei kiba la tip kum u I Love You Talang, u Tell Me Pyrtuh, u Ramesh Dkhar bad u Sampher Ksoo kiba la pyniap dusmon ïa u (L) Dameihipaya Papeng uba la jah naduh ka 10 tarik u nailar bad ïa ka met iap Jong la lap myn ha ka 24 tarik na Mihmyntdu Mynkoi sha rum ka surok Cattle Market na kawei kawei khlaw ba rit ba don hajan ka surok khyndew kaba jngai kumba 1 KM duna na ka surok Jowai By-pass (Soomer-Thadlaskeiñ Road) bad u dei ruh uba ñiah ïa ka kali Tourist Alto kaba don u registration number, ML-04D-2009 kaba ju kamai sha Jowai-Lad Rymbai-Khliehriat bad la suba jur ba kitei ki runar ki lah ban don kti ruh ha kaba pyniap dusmon ïa u samla Fullmoon Kharsahnoh uba na ka shnong Larnai, uba ju kamai toris da ka Swift Desire kaba don u registration number ML 04 D 1113, ha kaba u la jah ha ka 16 tarik u nailar bad ïa ka metiap la lap ha katei ka sngi hi ha ka por jan miet na shnong Mynkre East Jaiñtia Hills District ha ka lynti ban leit sha Amrit Cement.
Haba kren sha ki pathai khubor u bah Kyrmen u la ong ba um don jingtip eiei bad um ithuh hi ruh ïa kitei ki saw ngut ki nongpyniap briew kiba la shah kem ha ki pulit, halor kane ka jingshah buh ïa ka dur jong u bad pynsaphriang lyngba ki Facebook u bah Kyrmen u la byrngem bad ong ba un sa ujor noh da ka ejahar ha thanat namar kane baroh ka dei tang ka jingshim kabu jongno re jongno ban pynthoh bria bad kwah pynjah burom ïa u, la ong ruh ba kane ka la pynjah burom ym tang ïa u hynrei wat ïa ka ïing ka sem bad ka shnong ka thaw ruh, u la ong bad kren shai ba um dei satia uta u nongpyniap briew kumba ka pharep bad kumba la buh dur ha ki facebook bad um don jingtip eiei ruh ha kaba ïadei bad ka kam pyniap briew.
U bah Kyrmen Rymbai, u kyrpad ïa ki bor pulit kumjuh ruh ïa ki paidbah bad ïa ki paralok, ba kin sngewbha ïaleh shitom ban wad ïa kito kiba pynsaphriang bakla ïa ka dur jong u ha ki Facebook bad ban pyntip sha u lada ki lap ïa ki briew kiba la pyndonkam bakla ïa ka dur jong u, ba la buh lang bad ki dur jong ki saw ngut ki nongpyniap briew bad kyrpad ruh ba lada lap kin sngewbha ba kin phone bad pyntip mar mar sha u da kaba phone ha u number 8798902483. Ha kajuh ka por u kyntu ïa kito kiba pynsaphriang bakla lyngba ki Facebook ba kin delete noh bad weng noh ïa ka dur jong u bah Kyrmen Rymbai na ki Facebook, u la pynpaw ka jingsngew khia halor kane ka jingshah pyndonkam bakla ïa ka dur jong u namar um shym la dei satia u nongpyniap briew.