Sngewpyrshah jur ka seng HNLC ba thmu ka BJP ban pynlong ia ka ri India Kawei ka Jaidbynriew, Kawei ka Election

Shillong, Nailur 1 : Ka Seng Hynniewtrep National Liberation Council (HNLC) mynta ka Sngi Thohdieng ka pynpaw ka jingsngew khia bad sngewpyrshah jingjur halor ka jingthmu jongka sorkar BJP ban pynlong ïa ka ri India kata “Kawei ka Jaidbynriew Kawei ka Election” (One Nation, One Election) namar kane ka dei tang ka buit poh bad ka atiar ban pynkhlaiñ ïa ka jinghikai bad nongrim Hindutva ban pynlong ïa ka ri India kum kata ka ri ka ban don tang ka niam Hindu.
Ka jingtyrwa jongka Bharatiya Janata Party (BJP) ban pynlong ïa ka ri India kum kata Kawei ka Jaidbynriew bad Kawei ka Election (One Nation,ong Election) ka la pynlong ka jingïathir ïatai kaba jur halor kine ki buit poh ba sha lyndet jong kane ka party.Ka HNLC ka sngew ba kane ka jingthmu ka dei ban pynkylla ïa ka ri India na kata ka ri Synshar paidbah kaba laitluid sha kata ka ri Synshar ki blei ka ban aibor ïa kita ki jinghikai ne rukom pyrkhat Hindutva bad ban seng nongrim ïa kata ka Hindu Rastra”.“U General Secretary ka HNLC u bah Sainkupar Nongtraw ha ka kyrwoh ba u la pyllait paidbah u la ong “Ki jingpyrshang ban wanrah ïa ka rukom treikam ka ban phai khmat tang sha kawei ka nongrim, da kaba leh bym suidniew ïa ka nongrim jong ka jingdon kiwei pat ki jait Niam ne ban long ki bym ïashah ïa kano kano ka niam ha ka jingsynshar sorkar. Kane ka jingsngew ka pynmih ïa ki jingkylli ha kaba ïadei bad ki ‘Fundamental Values’ kiba pynkhlaiñ ïa ka Riti Synshar Paidbah ka Ri bad ka jingïada ïa ki hok jong ki jaidbynriew rit paid.
Hynrei dei ban kynmaw kawei ba ka ri India ka dei ka ri ba ïasoh lang da kiba bun ki Jylla ne ki hima kumba la kdew ha ka Article 1 jongka Riti Synshar ka ri bad kaba ïasyriem ruh kumba long ka United States. Ka India ka kynthup ïa kiba bun ki jylla bad ki It ki Hima kiba pynïasoh sha ka bad don ruh kiba la shu shah pynïasoh jubor. Kumta kane ka jingthoh ka long halor ka nongrim ban wanrah ka jingpynshai halor ki jingsngew diaw jong kiba bun ki seng Saiñ pyrthei, ki Seng Bhalang ki Riew shimet namar kane ka jingthmu khlem pep kan ktah ïa ka jingsynshar paidbah jong ka ri” pynpaw biang u bah Nongtraw.
Kane ka jingtyrwa ban wanrah ka jingpynkylla ha ka election kaba la tip kum Kawei ka Jaidbynriew Kawei ka Election ka la pynlong ïa kiba bun ban sngewkhia namar kane ka ktah jur ïa ka rukom synshar khadar jongka ri. Kiba bun ki pynpaw ba kane ka jingthmu ka long ban bat ïa ka bor tang nalor, ban pynduna ïa ki nongmihkhmat bad ban pyntlot bor ïa ki Seng Riewlum ne Seng Trai ri ba kin ym don bor shuh ban dang ïasaid ha ki ïing dorbar khamtam ban khniot ïa ka sur ki rit paid. Kane suki pa suki kan ktah ïa ka jingïoh ïashim bynta ne jingïa ryngkat ki nongmihkhmat na ki jaidbynriew bapher bapher kiba don ha ka ri. Ki Riew khraw pyrkhat bad ki Riew Said ain ki pynpaw ba ka ri kaba ïaid bad bun ki jaidbynriew kum ka India ka donkam ban phiah ïa ka jingsynshar khnang ban ïoh ïadon bynta ryngkat lang da baroh ki jaid niam bad ki jaidbynriew bapher bapher, ong ka kyrwoh.
Ka HNLC ka sngew ba kane ka buit ban wanrah ïa kata Kawei ka Jaidbyriew bad Kawei ka Election ka long kum ki shaka kali ban pyntyllun bad pynurlong ïa kata ka Hindutva Ideology kaba thmu ban pynlong ïa ka ri India kum kata ka ri ban don tang ka niam Hindu. Namar ka jingthmu jongki ka long suki pa suki ban pynkhlaiñ ïa kane ka buit poh jongki ban bad ban pynduh pyndam ïa ka jinglong laitluid ka India ha kaba ngeit ha kano kano ka niam ne ka jingsynshar ba laitluid khlem da ñiew ïa kano kano ka niam.Kane ka la pynlong ïa kiba bun ban buh ka jingkylli halor ki hok longtrai jongka jingsynshar paidbah ka ri bad ka jingïada ïa ki rit paid.
Ban sngewthuh shai kaei ka jingktah jong kane ka jingthmu, ka long kaba donkam ban phai ruh sha ka histori ka ri India kumno la thaw ïa ka India. ïa ka India ym shym la thaw ne tip da kata ka Niam hynrei da ka jingïasoh jong ki jylla kiba kynthup ïa ki It ki Hima kiba pynïasoh hi bad ki don pat ruh kiba la shu pynïasoh jubor bad phah soi jubor ïa kata ka Instrument of Acessioin da kaba shu pynap ktang suloi ïa ki. Kumta da kaba kdew bad ithuh sha kane ka histori jongka ri kam long kaba dei da lei lei ruh ban pyntreikam ïa kata ka buit ban wanrah ïa kata Kawei ka Jaidbynriew bad Kawei ka Election namar kane kan ktah ïa ka jingsynshar khadar paidbah ba ïar jong ka ri ong shuh shuh ka kyrwoh na u General Secretary.
Kumta halor kane ka jingthmu jongka sorkar BJP ban wanrah ïa kata ka buit synshar Kawei ka Jaidbynriew kawei Ka Election ka ban ktah jur ïa ka jingsynshar paidbah ka ri , kaba thmu ruh ban bat jubor ïa ka jingsynshar tang da ka sorkar pdeng ban pyntroiñ bad pynduh ïa ka bor ki Seng Saiñpyrthei Riewlum bad khniot ïa ka sur jong ki rit paid kine ki long kiei kiei kiba ym lah ban pdiang.
Na ka liang jong ka HNLC, ngi sngew ba ka jingthmu ban kyntiew ïa kawei ka nongrim bad ban thaw ïa ka Hindu Rastra kan pynduhjait ïa ka jingburom bad laitluid jong baroh ki niam bad ïa ka jinglong bym shah liang ïa kano kano ka niam ha ka jingsynshar ka sorkar. Kumta katba kane ka jingtyrwa ka dang don hapdeng ka jingïathir bad ïatai nia, ka long kaba donkam ban phaikhmat sha baroh ki liang bad ban pynthikna ba kano kano ka jingkylla ha kaba ïadei bad ka rukom pynïaid elekshon ha ka ri ka dei ban ïaid ryngkat bad ka nongrim jong ka jingsynshar paidbah bad ban mihkhmat na ka bynta ka bha ka miat jong baroh ki nongshong shnong” pynkut u Bah Sainkupar Nongtraw.