Shillong, Nailur, 24: U Myntri ba dei peit ïa ka tnad Food Civil Supplies & Consumer Affairs bad ka tnad Labour Employment & Skill u Bah Methodius Dkhar ha ka sngi Balang u la pynpaw ïa ka jingsngewnguh ïa u Myntri Rangbah ka jylla u Conrad K Sangma uba la pynrung ïa u ha ka Kynhun Myntri bad pynthikna ba ka jingthmu ba kongsan jong u kan long ban pynthikna ba kine ki tnad kin shakri ïa ki paidbah ha ka rukom kaba dei.
“Nga pynpaw ïa ka jingsngewnguh ïa u Myntri Rangbah ka jylla uba la pdiang ïa nga ban don ha ka Kynhun Myntri bad ïa ki nongïalam ka party jong nga bad ki nongtrei bad ki paidbah na ka Constituency jong nga,” la ong u MLA ka HSPDP na Mawshynrut Constituency.
U Bah Dkhar, uba bat ruh ïa ka tnat Registration & Stamps bad Cooperation, ula ïathuh ha ki lad pathai khubor ba u kwah ban don ïa ka rukom treikam “kaba beit.”
“Nga kwah shisha ban don ka rukom treikam kaba kynthup lang ïa baroh, ha kaba ngan don ka jingïalang bishar kam kaba bniah bad ki ophisar jong ki tnad kiba nga peit. Ha,oid, ki don ki kynhun kiba don bynta beit beit ne ki bym don bynta ha ka rukom treikam. Kumta, nga kwah ban don ka jingïalang bishar kam bad ki bad nangta ngan sa peit kaei kaba tnad kan ai ïa kaba bha tam kaba ngi lah ban shakri ïa ki paidbah,” u la ong.
U Myntri u la ban jur ruh ïa ka jingdonkam ban don ka jingïatreilang bad hapdeng baroh ki kynhun bapher bapher kynthup ïa ki ophisar bad ki nongtrei, ban dup ïoh ïa ka jingjop ha ka tnad.
Ha kaba ïadei bad ka tnad Labour, u Bah Dkhar u la ong ba dang donkam ban bishar bniah ban pynkhlaiñ ïa ka jinglah jong ka tnad ban ïada ïa ka jingmyntoi jong ki nongbylla bad ki nongai kam.
U la thmu ban bishar bniah ïa ki polisi kiba don mynta, ban ithuh ïa ki bynta ban pynbha bad ban pyrkhat ïa ki jingpynkylla thymmai ban pynbha ïa ka jingtreikam jong ka tnad.
Halor ka mat jong ki nongtrei bylla be-aiñ nabar ka jylla, u Myntri u la kam ba ka long kaba kongsan bha bad u la ong ba u thmu ban pynlong ïa ka jingïalang bishar kam bad ka tnad ban sngewthuh ïa ki sienjam ba la shim haduh mynta bad ban tip ïa ka lynti kaba bha tam khnang ban ïada ïa ka jingmyntoi jong ki paidbah ka Meghalaya katba ban pynthikna ba ki kam ba dang ïaid (jingtei) kin ym shah pynthut.
“Kane ka long mat kaba kongsan bha kumba ka long mynta namarba ki don shibun ki mat kiba la mih ha ki por ba ladep bad ha kine ki bnai ba ladep ruh, ki don shibun ki mat kiba la mih shaphang kane bad halor kane ka sobjek kyrpang nga kwah ban don biang ïa ka jingïalang bishar kam bad ka tnad khnang ban tip ïa kaei kaba ki la leh ha kine ki khyndiat bnai ba ladep bad kiei ki sienjam ba la shim ban ïada ïa ka hok jong ki briew jong ngi bad ba kan ym ktah ïa ka jingtreikam kaba la don lypa mynta,” u la bynrap.
Haba kylli ki jingkhmih lynti, u Bah Dkhar u la kam ba ki long kiba heh hynrei u la pynpaw ïa ka jingangnud jong u ban ai ïa kaba bha tam da ka jingïatreilang jong ki kynhun bapher bapher.
“Nga kyrmen ba ngin lah ban pyndep ïa kita ki jingkhmihlynti baroh bad ngan pyrshang ban pyndep katba lah,” u la pynkut.
