Nongstoiñ Nailur 18: Ka jingpynlong ïakop khwai dohkha ha ka pung Pamphyrnai ha ka sngi saitjaiñ ba la dep, ka la pynkyndit thret ïa ki rangbah bad ki shnong kiba marjan bad katei ka pung, namar ym pat ju jia koit haduh ba ka ki mynsiem briew kin shu duh ei tang namar ka jingdheng kali da ki bun kynta.
Halor katei ka jingkhlad noh jong iwei I khunlung ba ka kmie ka la kha hapoh kali bad ka jingkhlad jong uwei u briew na ka jinghap jong ka kali ha Sohwanthiang, u bah G.N.S.Myrthong uwei na ki riew rangbah na ka shnong Mawlangkhar haba ïakren bad u nongthoh khubor, u la ong ba kitei ki jingjia ki la pynpyrkhat bad pynsngewkhia bha ym tang ïa ki rangbah hynrei wat ïa ki paitbah nongshong shnong ruh.
Nalor kata u la ong ruh ba ha kaba ïadei bad ka jingpynlong ïa ki jingïakop khwai, na ka liang ki rangbah jong ki shnong ba marjan bad ka pung Pamphyrnai kim sngew don lynti ban ong ei ei, namar katei ka pung ka hap hapoh u pud u sam jong ka shnong Ksehkohlong. Ka dei ka kamram jong katei ka shnong ba kan pyrkhat bniah ban thaw ki lad ki lynti ban lait na ki jingjia, kiba lah ban ktah ïa ki nongleit nong wan khamtam ïa kiba pang ba shitom kiba donkam ïa ka jingsumar ba kyrkieh, kiba la kit ha ki Ambulance ban pynpoi sha ki hospital kum ha Mairang bad sha Shillong.
Nalor kata u la ong ruh ba ka dorbar shnong Ksehkohlong ka sngew ïahap jingmut na ka liang ki riew rangbah na ki shnong ba marjan, ki kloi ban ïapyrkhat bad ban ïa ai jingmut lem bad ban ïatrei lang ruh na ka bynta ka jingbha.
U bah P.Dkhar uwei na ki riew rangbah pat u la ong ba ka jingïakop khwai ha Pamphyrnai ka lah ban ai jingmyntoi ym tang ïa kiba ïoh ïa ki buskit, hynrei ka ai jingmyntoi ruh ïa ka dorbar shnong, ka kynhun pahara shnong, ki nongdie dukan bad kiwei kiwei hynrei ka don pat ka jingktah ha kiwei pat ki bynta.
U la ong ruh ba ka jingktah ka dei ka jingpynjaboh ïa ki sawdong sawkun na ka jingleit paiñkhana pathar, ka jingbret plastic bad kiwei kiwei. Nalor kata u la ong ruh ba katei ka pung Pamphyrnai, ka dei ka jong uwei u briew katba ki jaka ha baroh sawdong ki dei jong bun ngut ki briew. Hynrei ki trai jaka kim shna satia ïa ki paiñkhna bad dei na kata ka daw ba kiba wan khwai ki hap ban leit paiñkhana pathar sha ki sañium bad ki bniap kiba don harud katei ka pung.
