Shillong, Jylliew 28: U Myntri Rangbah ka jylla u Conrad Sangma ha ka sngi Thohdieng u la ong ba ka Ministry of Road Transport and Highways (MoRTH) ka la pynpaw ïa ka jingsngewkhia halor ka jingeh ban ïoh ïa ka jaka na ka bynta ban shna ïa ka surok hapoh ka jylla Meghalaya.
U Myntri Rangbah ka jylla ha ka jingleit ïakynduh ïa u Myntri ka tnat Road Transport and Highways ha New Delhi u la ong ba ka sorkar pdeng ka la pyrkhat ruh ban pynsangeh noh ïa ki project kiba don ka jingeh ban ïoh ki jaka.
U Myntri Rangbah u la ïathuh ruh ba u la ïakynduh ïa u Myntri ka Sorkar Pdeng uba khmih ïa ka Civil Aviation bad u la kyntu ïa u ban pynsdang noh ïa ka jingpynher ïa ka liengsuiñ kaba mynmied na Shillong Airport. U la ïathuh ruh ba ka la don ka jingïakren ban pynïar bad pynheh ïa ka Baljek Airport bad kumjuh ruh ïa ka Shillong Tura flight.
Ha kajuh ka por na ka liang u Sangma u la kynduh ruh ïa u Myntri ka tnat DoNER bad pynpaw ba ka jingïoh skhim na ka Ministry of DoNER ka long kaba kyllaiñ bad dei ruh ban pynsuk ïa ki kyndon.
“Ka Sorkar Meghalaya ka la dep ban pyndonkam bha ïa ka fund kaba la wan na ka rural development ministry. Kum ka nuksa mynshem snem lah jan 1,50,000 ki ïing PMAY lah dep ban tei ha ka jinglut kaba T. 1,500 klur ka pisa ba la ai da ka sorkar pdeng,” u la ong.
“Ha kajuh ka por ki projek kiba heh kum ka MNGREA bad kiwei pat ki skhim ka sorkar jylla ka la pyntreikam hok,” ula bynrap.
U la ong ba ka la don ruh ka jingïasyllok bad u Myntri ka tnat Skill and entrepreneurship shaphang ki prokram bapher bapher ba la pyntreikam da ka jylla.
