Sngewkhia jur ka JNC namar ka jingshah pynjulor ki jaka rep jong ki para doh para snam
Khliehriat, Nailur 4: Ka Jaiñtia National Council (JNC) ka pynpaw ka sngewkhia bad sngewsih kaba khraw namar ka jing shah kyndang jubor bad shah pynjulor ïa ki bri, ki jaka rep jong ki paradoh parasnam kiba shong ha Assam, Cachar District, bad ong ba kane ka jingleh jong ki bor District, ki bor pulit bad ka tnat khlaw jong ka Cachar District, ka pyn i shai baka Assam hi kam burom ïaka jing long trai jaka jong ki paradoh parasnam kiba shong ba sah sha kitei ki shnong kiba ki la ri la sumar ïa kitei ki jaka daki spah spah snem mynshwa
“Ngi lah ruh ban ong ba naduh ki por u phareng, ki Shnong Khasi,Jaiñtia kila don lypa ha kitei ki bynta jong ka Assam bad kim dei kiba dang shu wan buhai shnong ha kito ki jaka bad ka History ruh ka kren shai ïa kane” ong u kyrwoh.
“Balei ki Sorkar Meghalaya naduh ki por barim haduh ki por kiba mynta kam ju nud ban ïa kren bad ka sorkar Assam halor ka phang ban ai ïaka jing ïada bad ka jing ithuh kaba kyrpang ïa ki shnong Khasi, Jaiñtia kiba don hapoh Assam, khnang ba kin dup lah ban long trai ïala ka khyndew u syiap kaba ki la shong la sah la bun bun snem mynta”
Na ka liang ka JNC ka kyntu jur ïa ka sorkar jylla ( MDA 2.0 ) ba kan shimkhia ban ïa kren bad ka sorkar India halor ka jing leh donbor jong ka Sorkar Assam ïa ki shnong Khasi, Jaiñtia kiba la don hapoh Assam naduh shwa ka jingioh jinglaitluid jong ka Ri India bad ban dawa ruh na ka sorkar India ba kan ai ïa ka jing ïada kaba kyrpang naka bynta ka hok long trai jong ïa la ka khyndew ka syiap , ban pynneh pynsah ruh ïa la ka Riti ka Dustur jong ki Khasi, Pnar kiba shong shnong hapoh ka Assam.
Ka seng ka buh ruh ka jing kylli ia ka Sorkar Assam ba lada kiwei ki rit paid kiba don hapoh Assam ki ioh ïaka jing ïada ba kyrpang ban long trai ïaka khyndew ka shyiap bad ban pynneh pynsah ïala ka riti ka dustur, hato kan eh aiu ïa ka sorkar Assam ban ai ka juh ka jing iada ïaki Riewlum, rit paid Khasi,Pnar kiba don hapoh Assam? Pynkut u kyrwoh na u Publicity Secretary JNC u samla Mebanteilang Sukhlaiñ.