Nongstoiñ, Jymmang 21: Ka kynhun ki sordar bad ki rangbah shnong jong ka thaiñ Maweit hapoh ka shatri jong ka Synjuk Nongsynshar Shnong Maweit Area, ha ka sngi saitjaiñ ki la leit ban ïakynduh ïa ki nongpyntrei ïa ka surok kaba la tip kum ka Rocky Dhar Construction, ban kyntu ïa katei ka kompani ba kan kham leh bniah haba pyntrei ïa katei ka surok kaba 23 km.
La ong ba ki nongshong shnong jong katei ka thaiñ ki da kwah eh ba ki nongpyntrei ïa katei ka surok, kin leh kham kloi bad ki pynpaw ruh ïa ka jingsngewkmen ïa ka sorkar MDA I bad MDA II, namar ka jingshah shkor jong ka ïa ka jingangnud jong ki paidbah ka thaiñ, kiba la mad ïa ka sangsot mynta la kumba 60 snem kynthih ïa ka jingsniew jong katei ka surok kaba naduh ka sorkar Assam.
Ïa katei ka synjuk la lamkhmat da u bah Orios Thongni Secretary ka Synjuk Nongsynshar Shnong Maweit Area bad kitei ki nongsynshar ki la ïoh ban ïakynduh ïa u bah Evantist Pohshna, bah Kyrpad Shylla bad u bah Latos Daw, kiba dei ki nongkmih ïa katei ka kam lyngba katei ka kompani kaba la tip kum ka Rocky Dhar Construction, kaba la sdang shait shait mynta la kumba kattto katne bnai ban pyntyllun ïa ka kam.
