Sngewbha kynnoh ruh ïa ka NPP nangno ka pynïoh ïa ka 38000 klur na bynta ki kam pynroi : Dy CM

Shillong, Rymphang 11: U President ka National People’s Party (NPP) ka Jylla bad Symbud Myntri Rangbah ka jylla u Bah Prestone Tynsong ula kyntu ïa ki Liang Pyrshah khamtam ka Voice of the People Party (VPP) ba kin wad nangno ka Sorkar ba ïalam ka NPP ka ïoh ïa ka song pisa ba palat 38,000 klur tyngka ban pyntreikam ïa ki kam pynroi ha baroh ki liang hapoh ka Jylla.
“Ki la kynnoh laiphew jait pyrshah ïa u Bah Prestone bad pyrshah ia u Conrad hynrei nga kwah ban ai jingmut ïa ki ba kin kynnoh ruh ba nangno ka NPP, Prestone bad Conrad ki lute ban wanrah haduh katne ki kam pynroi ha Meghalaya. Ki dei ban wad nangno ngi ïoh da ki hajar klur ka pisa na ka bynta ka roi ka par ka Jylla” ong u Bah Prestone haba kren ha ka rynsan ïalap elekshon ha Shnong Umthli ban pan jingkyrshan ïa u Kyrtong ka NPP na Langkyrdem-Laitkroh Bah Rahboklang Tynsong ha ka miet Lah Sngi U Blei.
“Naduh ka sngi ba ngi shimti ïa ka Sorkar ha Meghalaya, ngi la lah ban wanrah ym duna ïa ka 38000 klur tyngka ban pynthikna ïa ka roi ka par ha baroh ki liang lyngba ki Tnad bapher bapher jong ka Sorkar na ka bynta ka bha ka miat ki paidbah ka Jylla. Hynrei, ka long kaba sngewsih ban ïohi ïa ki manifesto jong kiwei ki seng saiñpyrthei khamtam ka party ba dang shu mih thymmai kaba la seng tang ban kynthoh pyrshah ïa ki kam ba bha jong ka Sorkar” ula byntap.
U bah Prestone ula kular ruh ba ka party jong u kan shim ïa ki sienjam ba donkam ban nang pynkhlaiñ ïa ki Autonomous District Council (ADC) bad pynkup bor ïa ki Khlieh Nongsynshar bad ki Dorbar Shnong, ki Hima lada shah jied ban wan ha ka bor ha ki ADC elekshon, ka ban long la 21 tarik Rymphang.
“Ngi kwah ban nang pynkhlaiñ ïa ki dustur bad ki riti ba riew spah jong ki paid riewlum trai muluk, ka hok halor ka khyndew ka shyiap bad ka synshar Shnong synshar hima da kaba pynkupbor ïa ki Hima bad Dorbar Shnong. Hynrei, ka long kaba sngewsih ban ïohi bad ïohsngew ba don ki briew kiba byrngem ban ujor ejahar pyrshah ïa ki Dorbar Shnong (kaba thmu ban pyntlot ïa ki) hynrei nga ong ha phi ba wat ka ECI ka ai ka bor bad jingithuh ïa ki Dorbar Shnong ha ka por ka elekshon” ula ong.
Ula buh jingkylli ruh ïa ka jingpyrshang ban pyntlot ïa ka riti aijait kmie da kiwei ki seng saiñ pyrthei khamtam ” kito kiba pynshlur ïa ki paidbah ban shim jait na u Kpa. kaei ka ban jia ïa ki pateng ban wan jong ngi lada ngi ailad”.
“Kumta, nga kyrpad ïa ki paidbah ba kin ym shah ïalam bakla bad ba kim dei ban ailad ban pyntlot ïa ka riti ka dustur ba riewspah jong ngi” ula bynrap.
U Bah Prestone ula kam ruh ba ka Sorkar ba ïalam da ka NPP ha ryngkat ka Executive Committee ha KHADC kala mynjur ïa ka Land Act ban ïada ïa ka hok halor ka khyndew ka shyiap jong ki trai ri trai muluk bad ong “Ngi kwah ban pynkhlaiñ shuh shuh ïa kane ka aiñ”.
“Kila don ki jingpyrshang ban ïalam bakla ïa ki paidbah bad ka NPP kala shimkhia bha ïa kane ka kam.Watla ki jingkynnoh ki mih pyrshah ïa ka NPP, ngi la nang khlaiñ. Ngi la lah ban ai ka Sorkar kaba skhem. Shuwa u 2018, ki jingpynkhyllem Sorkar ki jur bha hynrei naduh ba shimti ka NPP ïa ka Sorkar, ka kam pynkhyllem sorkar kala jah” ula ong haba bynrap” Kane ka dei namar kam ju don ka jingïashrut hapoh ka NPP ym kum ha kiwei pat ki seng saiñ pyrthei khamtam ka seng saiñ pyrthei ba thymmai (VPP) ka don ka jingïapait ïa pra hapdeng ki MLA kaba lam sha ka jingbym ïa sngewthuh jingmut ha ka jingïa ai ticket ha kane ka elekshon ADC”.
Une u Heh ka NPP ula kren ruh halor ka jingmih ki seng saiñpyrthei kum ki tit kaba la nang phiah bad pynïapait ïapra ïa ki paidbah ka Jylla.
“Nga dang pyrkhat ba ka seng saiñ pyrthei ba dang mih thymmai (VPP), kaba jop 4 ngut ki MLA, jin ba ki ïatreilang bad ka UDP, HSPDP- kila jan ïoh ïa u nombor ban thaw sorkar hynrei namar ba ki ieid Jaidbynriew shaba palat pud, ki jied ban pharia ïa ka Jaidbynriew ( da kaba seng ïa ka seng sain pyrthei ba thymmai). Namar kata ka shong ha phi ban bishar. Nga lah mih na ka Congress bad leit sha ka NPP. Nga sngew ba phi baroh phi dei ban wan shakhmat bad kyrshan ïa ka NPP namar ngi dei ka party kaba ïatylli, na kata ka daw ki jingkyrkhu kila wan tuid hapoh ka Jylla Meghalaya”.
Nalor kane, u Symbud Myntri Rangbah ula ong ba ka Sorkar kala kular ban ai kam sorkar ïa lai ngut ki nongïalehkai kiba dang shu ïoh khur ïa ka takma bad wanrah nam ïa ka Jylla na ka 38th National Games.
“Ngi pynshlur ïa ki samla ba kin paw ha ki kam ïalehkai. Hynrei, ki don ki party kiba kam ba lada ki paidbah ki jied ïa ki, kin sa aikam hynrei nga ong ba wat ju ngeit ïa ki namar ki shu pynbiej ïa phi” ula ong.
Kat kum ka jingong jong u, ka Sorkar kala pynleit jingmut haba pynkhlaiñ ïa ki SHG ban pynkupbor ïa ki kynthei. Ka jingdon ki SHG kala kiew na ka 5000 sha ka 50000 tang ha kine ki 7 snem.