Sngew lyngoh ka KSU-EJHDU ba ym pat don ki contactor ki ban pyntrei ïa ka jingmaramot ïa ka surok NH-6

Khliehriat Naiwieng 4: Ki nongïalam bad ki dkhot jong ka Khasi Students Union East Jaiñtia Hills District hynnin ka sngi ki la leit ban iakynduh ïa u Deputy Commissioner ka East Jaiñtia Hills, u Abhilash Baranwal, IAS bad ki la wad jingtip ha kaba ïadei bad ka surok national highway, ki la pynpaw ruh ka jingsngew lyngoh ba ki contractor kiban pyntrei ïa ka surok haduh katta ruh kim pat sdang ïa ka kam ban maramot ïa ka surok.
Ka jingsngew lyngoh jong ka seng ka dei namar ba na ka liang u Deputy Commissioner, u la iathuh ba ki la don kiwei pat ki company shimet kiba la shim contract ban maramot bad ban siang rong ïa kane ka surok NH-6 kawei ka company ka la shim naduh Malidor haduh Sonapyrdi bad ka kawei pat na Sonapyrdi haduh Khliehriat, halor kane ka seng ka sngew lyngngoh ba haduh mynta ruh ki contractor kim pat sdang ïa ka kam.
Na ka liang ka seng ka pynrem jur ïa ka sorkar MDA 2 ba la lam khmat da u Conrad Sangma bad pynrem jur ruh ïa ka jingleh ka NHAI namar ka jingleh bym salia ha kaba iadei bad ka jingeh ba ki paidbah ki iakynduh ha ka leit ka wan na ka daw ka jingnsiew palat kane ka surok national highway ha East Jaiñtia Hills District bad ong ruh ba kane ka paw ba ka sorkar bad ka NHAI ka la leh beiñ ïa ki paidbah
Ha kajuh ka por ka KSU East Jaiñtia Hills District ka pynrem jur ruh ïa ki ar ngut ki nongmihkhmat kiba napoh ka district, u bah Kyrmen Shylla bad ka kong Santa Mary Shylla namar ka jingbym lah jong ki ban pynbor ïa ka sorkar ban phai khmat lem ban peit lem ïa ka bha ka miat, ïa ka koit ka khiah jong ki paidbah jong ki kiba dei ki nongshong shnong jong ka East Jaiñtia Hills District.
Ka seng ka kynthoh jur ruh da kaba ong “Hangne ka paw shai ka jingbymler ki nongmihkhmat, kiba jur ka jingbamsap, ai ba u paidbah hi un jubab ïa kane ka jingshah lehbeiñ, ko sorkar, ki paidbah ki dang im kim pat iap, ka sorkar ka kwah da ka jingiakhih imat ban pei ki shkor”
Ka KSU east Jaiñtia Hills District ka la pynpaw ruh ka jingsngew khiah namar ka jingjur palat ka khyndew pum pum kaba mih namar ka jingsniew palat ka surok, ki paidbah kiba naduh Tuber Shohshrieh, Khliehriat ter ter shaduh Malidor ki la mad ïa ka jingpum pum khyndew kaba shyrkhei bad ong ruh ba kane ka pum pum khyndew ka buh jingma ïa ka koit ka khiah jong ki paidbah khamtam ki khynnah skul kiba dang rit bad kiba la san kiba iaid ha rud surok kiba mad ïa kane ka jingpum pum khyndew ba i shyrkhei.