Nongstoiñ, Naiwieng 4: Na ka liang ka JAC ki saw shnong kata ka Nongmisei, Nongumkap, Porthyrnang, Nongkabur bad Nongumkap ha ka sngi thohdieng, ka la aiti ïa ka dorkhas ha ka jingïakynduh ïa u SDO ka MEPDCL Mawshynrut Civil Sub-division, kumjuh ruh ban ïa kren bad ban pynkynmaw biang halor ka jingkyrpad ban pynbeit thymmai ïa ka laiñ bording ka ban sa ïaid lyngba ka Nongjri, Mawpaier, Nongmisei, Porthyrnang, Nongkabur shaduh Nongumkap.
U Bah J. Dkhar u la pynkynmaw ba ka JAC ka la wan ban ai da ka dorkhas ha ophis treikam u SDO ha ka 26 tarik u Naitung mynta u snem halor kane kajuh ka jingkyrpad.
Ka Nongmisei lei kaba pynïasoh na Garo Hills ka shem jynjar haduh katta katta, lada ki duh light ne kiew bai lait bad ban leit siew bai lait, namar ka hap leit shaduh Nonggalbibra Civil Sub-division South Garo Hills bad nalor ba jngai sa ka jingbym sngewthuh bha ha ka ktien thylliej.
Ka JAC ka la kyrpad ïa u sahep SDO ban shimkhia kloi katba lah halor kane ka jingkyrpad, namar ki shnong kiba hap ha kine ki la sohsat bad jynjar sat halor ka jingduh light khah khah na ka jingjngai palat ka laiñ pynïaid bording barim.
Ha ka jingkren bad u sahep SDO na ka liang jong u, u la kular ban shimkhia mardor da kaba yn wan noh ban peit ne jngoh ïa kane ka jingkyrpad ha ki sngi bad ki taiew ban wan.
