Nongstoiñ, Jymmang 30: Ki san seng ba kynthup ïa ka HANM, WKSU, UHM, MYF bad WYF nalor ba ki la ai por shi taiew ïa ka sorkar ban pynshai halor ka jingpynkynriah ïa ki tiar ki tar na ka Maternity Child Hospital Nongstoiñ, hynne ka sngi ba ar ki la leit ban buh jingthoh ruh sa ha u DC Nongstoiñ bad kumjuh ruh ha ka ophis jong ka DMHO, ba ki dei ban shimkhia bad leh ei ei ban ai jingpynshai ba balei la shu rah syndet ïa ki tiar kiba la mang ha Nongstoiñ MCH sha Civil Hospital Mawkyrwat.
Ki daw kiba ki san seng ki buh ba ka sorkar bad kine ki khlieh nongsynshar ki dei ban jubab ki long, kaei ka daw ba la rah noh ïa ki tiar ba la bhah na ka bynta ka Nongstoiñ MCH sha Mawkyrwat. Mano ba ai jingbit halor kane bad balei ïa ka mang kyrpang ha Nongstoiñ la rah noh shawei pat.
Naduh mynno kane ka hukum ka wan ban pynkynriah bad ka tnad ba dei peit ka dei ruh ban pyntip paitbah ïa ka sanction order katkum ka sorkar. Ki san seng ki la pynkynmaw ruh ba ki la dep ban aiti shi taiew ban pynshai, lym kumta ym banse ban ïaid da ki sien jam ba tyngeh.
