Skhem nongrim ki nongkyrshan jong ka HSPDP ban kyrshan ïa u Bah Medalsing Lyngdoh

Mawkyrwat, ‘Naiwieng, 04: Ka jingpynkhreh jong ki seng saiñ hima sima na ka bynta ka elekshon MLA jong u snem 2023 ha kine ki sngi ka la nangïai paw, ha kaba mynta ka sngi ka 4 tarik u ‘Naiwieng, 2022 ki nongkyrshan jong ka Hills State People’s Democratic Party (HSPDP) jong kawei ka Unit ki la pynpaw ba ki dang ïaineh hi ka kane ka party ym kumba la ïoh ban ki la ai ka jingkyrshan sha kiwei pat ki party.
Halor kane ka bynta, mynta ka janmiet na ka liang ki nongkyrshan jong ka Hills State People’s Democratic Party (HSPDP) ki la pynlong ka jingïalang hapoh ka ophis treikam jong ka party ha kaba ha kane ka jingïalang ki la shim da kawei ka sur ban nym kyrshan ïa kiwei pat ki party hynrei kin ïaineh beit ha ka HSPDP kaba la lam khmat da u bah Medalsing Lyngdoh kum u kyrtong.
Haba kren ha ki lad pathai khubor, ki nongïalam jong ka party HSPDP ba kynthup naduh u President u bah Nolipstar Lyngdoh bad u bah Sheckstar Paliar, General Secretary jong ka HSPDP Mawten Primary Unit ha kaba ma ki ki la pynpaw ba haduh mynta kum ki nongkyrshan jong ka party kim shym la don da kawei pat ka jingmut ban leit sha wei pat hynrei ban ai beit ka jingkyrshan ba rad bah ïa u kyrtong ba ka party ka la dep ban pynkhamti bad uta u dei u bah Medalsing Lyngdoh.
Haba kren shaphang ka jingïaineh jong ki nongkyrshan, ki la pynpaw ba kawei ka Unit jong ka HSPDP kaba dei na ka Mawten Primary Unit ki la ong ba haduh mynta hi ka dang ai ka jingkyrshan ïa kane ka party ym kumba la kam da u MLA ba mynta u bah Renikton Lyngdoh Tongkhar ba u la ong ba ki nongkyrshan jong ka HSPDP na kane ka unit ki la leit ban pynïasoh bad thmu ban bud ryngkat bad u sha ka United Democratic Party (UDP), “em kam dei kumta, hynrei kin ïai don beit bad ka HSPDP ban ai ka jingkyrshan ba pura khnang ba kane ka party kan jop ha une u snem 2023”, ong u bah Sheckstar Paliar, General Secretary jong ka HSPDP Mawten Primary Unit.
Katba na ka liang jong u bah K.D. Wanniang, General Secretary ka HSPDP Mawkyrwat Circle ha ka jingkren jong u u la pynpaw ka jingsngewkmen ban ïohi ba ki nongkitkam bad ki nongkyrshan jong ka HSPDP napoh ka shnong Mawten haduh kane ka khyllip mat ba mynta ki dang skhem shisha ka jingmut jingpyrkhat bad kyrshan pura ïa u kyrtong kane ka party. Namarkata, kum u General Secretary ka HSPDP Mawkyrwat Circle u la pynpaw ka jingpdiang sngewbha na ka bynta baroh ki nongkyrshan kiba rim bad mynta ki la dei ki nongkyrshan kiba thymmai namar u nongïalam uba rim (bah Renikton Lyngdoh Tongkhar) u la thmu ban leit noh sha kawei pat ka party.
“Ym dei tang na ka Mawten Primary Unit kiba dang ïai neh ha kane ka HSPDP hynrei wat na kiwei pat ki Primary Unit ruh ki dang skhem hi ka jingmut jingpyrkhat ban kyrshan rad bah ïa kane ka party”, ong u bah K.D. Wanniang.