Sikkim Tsomgo Ultra Marathon: Jop u Okitlang ha ka 72km; wan ba lai ka Ritibaiahunlang haka 42km

Shillong, Lber 10: Arngut ki Samla Khasi, ba kynthup ïa u Okitlang Syiemlieh bad i samla Ritibaiahunlang Jyrwa, ki la wanrah nam bad burom ïa ka Jylla da kaba wan ha ki kyrdan ba hakhmat ha ka Tsomgo Ultra Marathon 4.0 ha Sikkim.
Ka jingïashimbynta jong kine arngut sha kane ka jingïakop mareh kadei ha ka 09 tarik u Lber, 2025 (sngi Sngi U Blei), ha kaba u Okitlang Syiemlieh u la wan ba nyngkong ha ka jingïakop mareh ki shynrang ba 72km (men’s 72km event), katba ka Ritibaiahunlang Jyrwa ka la wan kyrdan ba lai ha ka ïakop mareh jong ki kynthei ba 42km (women’s 42km event).
Ka Tsomgo Ultra ka dei tang ma ka ka jingïakop mareh Ultra ha Sikkim bad ki nongmareh ki hap ban ïaid lyngba ki jaka ba itynnad jong ki lum Himalaya ka thaiñ Mihngi ryngkat ka lynti kaba kham jwat.
U Okitlang u la ïohpdiang ïa ka khusnam pisa kaba T35,000, katba ka Ritibaiahunlang ka la khur ïa ka khusnam pisa kaba T10,000. Baroh arngut ki dei ki pulit jong ka Meghalaya.
U Okitlang u dei u samla ba la ju ïashimbynta ha ki Ultra marathons. U la wan ba ar ha ka 72km Mawkyrwat Ultra ha u snem 2018 bad jop ïa ka jingïakop mareh ba 100km jong kane ka kajuh ka lympung ha u snem ba bud. U la mihkhmat ruh ïa ka Meghalaya haka National Cross Country Championship ha u snem 2022. Kawei na ki jingïakop mareh ba dang shen jong u ka dei ha ka Run for the Rhino 62km Ultra Marathon ha Assam ha u Nohprah, ha kaba u la jop.
Na ka liang jong ka Ritibaiahunlang, ka la ïashim bynta ha ka jingïakop mareh ba 10km jong ki kynthei ha ka 3rd Sohra International Half Marathon ha u Nailur jong u snem ba la dep bad ka Assam Rifles Half Marathon ha u Nohprah.