Shillong, Nailar, 14: Ka seng kieng atiar Hynñiewtrep National Liberation Council kaba dang don mynta hapdeng ka jingïakren ïasuk bad ka Sorkar India bad kumjuh ruh bad ka Sorkar Jylla, ha ka sngi U Blei ka la sieh da ka lama jong ka Seng ha jingkieng Wahumkhrah ha Jaïaw Jingthang Briew, Shillong.
Ka jingsieh ïa kane ka lama ka dei ruh shibynta ka jingrakhe jong ka seng HNLC ïa ka sngi ba la seng nongrim ïa ka ha ka 14 tarik, Nailar, 1987 bad mynta u snem 2022 ka Seng ka la rakhe ïa ka jingïaid lynti kaba 35 snem pura ha ka jingïaleh pyrshah ïa ka Sorkar India.
Katkum u kyrwoh ba la pathai da u General Secretary u Bah Saiñkupar Nongtraw ha ka rynsan Social Media u la pynbna paidbah ba ka seng ka la sieh ïa kane ka lama ha Jaïaw Jingthang Briew.
Tang hadien katno katne por, ki Pulit kiba la ïoh jingtip halor kane, ki la leit kurup noh ïa kane ka lama ban rah sha thanat.
Haduh mynta ki Pulit ki dang pynlong ka jingtohkit ban lapdien ïa ki dkhot jong ka seng kiba donkti ban sieh ïa kane ka lama ha jingkieng Jaïaw Jingthang Briew.
Kum ban shu pynkynmaw hangne, ha ka sngi Saitjaiñ ka HNLC ka la phah rah ïa u syntiew lyngba ka HNYF ba la buh ha u lum jingtep jong u nongïalam barim ka HNLC u Bah Cherishtarfield Thangkhiew ha ka lyngkhuh dap shi snem ka jingshah siat ïap jong u.
