Ngam hun namar tang 30-40 % lah ka Meghalaya ban pyntreikam ïa ki skhim sorkar pdeng : Tudu

Shillong, Nailar 14 : U Myntri khynnah ka sorkar pdeng uba dei peit ïa ka tnad Jal Shakti bad Tribal Affairs u Bishweswar Tudu u la pynpaw ba um hun satia ïa ki jingpyntreikam ka sorkar Meghalaya ïa ki skhim jongka sorkar pdeng namar ka lah ban pyntrei tang 30-40 % ïa baroh ki skhim na ka sorkar pdeng.
“ Ha ki kot ki sla te nga sngewhun katba ha madan pat ngam hun” ong u Tudu ha ki lad pathai khubor.
“ Nga la bthah ïa ka sorkar jylla ba kan pyrshang ban pyndep ïa baroh ki skhim hapoh ka por ba la buh ym ban sahteng ne sahkut da ki snem “ ong u Tudu.
Une u myntri ka sorkar pdeng u la wan sha kane ka jylla ban wan jurip ïa ki skhim ka sorkar pdeng arsngi lynter. Ha ka Sngi Thohdieng u Tudu u la mih jyndat na ka jingïalang bad ki ophisar jongka sorkar namar kim shym la pynbiang ïa ki jingthoh jingtar ban ïa bishar bniah kumno la pyntreikam ïa ka skhim Jal Jeevan Mission. U la bthah ruh ïa ka sorkar jylla ba kan twad jingmut lang na baroh ki nongïalam jong ki seng saiñ pyrthei halor ka jingpyntreikam ïa ki skhim.
“ Ka daw ka long ba la mih ki jingkynnoh ba kiba ïoh ïa ki skhim sorkar pdeng ki dei tang kito ki myntri bad MLA jongka sorkar katba kiba don ha ka Liang Pyrshah kim shym la ïoh skhim ei ei ruh. Kumta nga la bthah ba dei ban twad jingmut bad ïatrei lang bad ki MLA ka liang pyrshah ruh” ong biang u Tudu.
Ha kaba ïadei bad ka jingpyntreikam ïa ka Ekalavya Model Residentioal Schools (EMRS) ba la mang pisa da ka tnad Tribal Affairs u Tudu u la ong ba ki don kito kiba la sdang ban trei hynrei ym pat dep ka kam don pat kiba dang khot Tender ruh. “Ngi la buh por ïa kine ruh ba dei ban pyndep shwa u 2024. Kane ka dei ka kamram jongka sorkar ban pynsted ïa ki jingpyntreikam . Ynda nga la poi sha Delhi ngan sa ïakren ba ki kam kin ïaid sted noh khnang ban tip ba lada kito kiba la ïoh ïa ka kam ki lah ban trei yn ïoh ban aiti noh shawei” ong biang u Tudu.
U la ong ruh ba ka sorkar ka dei ba wad shuh shuh bun ki tyllong umdih khnang ban pahuh um ha ka jylla.U la leit jurip ïaka jaka pynpoi um sha sor kata na ka Greater Shillong Water Supply Scheme (GSWSS) PHase III ha Mawphlang. U la ïathuh ba u ïohi ïa ki pipe blue kiba la pun lynter ka surok shaduh Mawphlang bad lada jia ba ïa kane ruh ym lah ban pyndep ha ka por ba la buh ka sorkar pdeng kan sa leh ei ei da kaba daiñ kuna ïa kiba pyntrei.