Sieh ka KAAC da ka Sign Board jingmaham ha shnong Khanduli, bitar ka JSM

Jowai, Naitung, 30: Ka Jaiñtia Students Movement (JSM), ka la pynpaw ïa ka jingbitar shla halor ka jingsieh ka Karbi Anglong Autonomous Council (KAAC) ïa ka Signboard jingmaham ha ka jingjngai kumba 400 metar eiei na ka Enty Tax Gate hapoh u pud u sam jong ka shnong Khanduli, West Jaiñtia Hills District.
Ha u kyrwoh, ka JSM ka la takraiñ tyngeh ïa ka Sorkar Meghalaya Democratic Alliance (MDA) kaba ailad bad shu shah jem shaba palat pud kat haduh ba ki Karbi kin ïoh leh mon bad ban kam trai ïa ki jaka ki puta ha ka shnong Khanduli.
Ki Regional Committee jong ka Sorkar Meghalaya bad ka Sorkar Assam ha ka jingïakren pynbeit pud ba dang shen ha ka jingïalang kaba la long ka shnong Umkiang ki la buh sngi ban ïakren pynbeit shwa ïa u pud u sam jong ka Psiar-Khanduli bad sa ïa ka Block-1 kaba kynthup haduh 36 tylli ki shnong kham hadien.
Ka jingkyntur pud jong ka Sorkar Assam lyngba ka Karbi Anglong Autonomous Council (KAAC) sha u pud u sam jong ka Jylla Meghalaya ka la paw tyngkreiñ hadien ba ka la pynieng da ka Entry Tax Gate ha ka shnong Khanduli naduh ka 15 tarik, Ïaiong, mynta u nsem watla kane ka jaka ka dei kaba dang hap hapoh u pud u sam jong ka shnong Khanduli bad kane jaka kam hap satia ha ka jingïakhajia pud bad ka Assam hynrei ka Sorkar Meghalaya haduh mynta kam pat lah satia ban weng ïa ka khyrdop khrong khajna beaiñ jong ka KAAC.
“Kum ka seng, ka la ngiah bad dukha mynsiem ban ïohi ïa ka jingïoh lehmon jong ka KAAC da kaba kyntur pud beaiñ kat haduh ba ka la wanrah ïa ka jingduhnong kaba khraw bad wanrah ruh ïa ki jingeh kiba har rukom ïa ki Khasi-Pnar kiba shong basah ha khapupd bad ka West Karbi Anglong District namar ka jingmynthi jong ka Sorkar Meghalaya,” ong u kyrwoh.
Ka Seng ka la rai, lada kine ki jingjia ki ïai jia shi jia kumne, kan leit hiar hi sha ka shnong Khanduli ban jynrat ïa ka Entry Tax Gate bad ïa ka Signboard ba la buh da ka Sorkar Assam na ka bynta ban ïada ïa ka khyndew ka shyiap bad ïa ki paradoh parasnam lajong kiba sah ha ka thaiñ khappud.
“Lada jia eiei ka Sorkar Jylla ka dei ban shim ïa ka jingbahkhlieh ïa kita kiei kiei baroh,” la byrngem ka Seng.
Ka seng ka la pynrem jur ïa ka Jaiñtia Hills Autonomous District Council (JHADC) wat hadien ba ka Seng ka la aiti da ka jingthoh hynrei kam shym la leh eiei bad ka shu sngap mynthi haduh mynta.
“Kane ka pyni shai ba ka JHADC kam larkam eiei bad kam don ïa kata ka iktiar kumba la pynkhamti ha ka ban ïada ïa ka khyndew ka shyiap, ïa ka riti ka dustur bad ïa ka jait bynriew ritpaid,” la kynthoh ka Seng.
“Imat wat ki MDC kiba shong hapoh ka District Council ki long tang kum ki diengïap, tang shu wan ka ‘erïong kin sa shah rong bad khyllem noh bad kane ka la pynskhem shisha ïa ka jingong mano re mano ‘ka JHADC ka la jan ngam jyllop” la pynkut ka kyrwoh na ka seng.
Dang shen ka Hynñiewtrep Border Dispute Redressal Forum (HBDRF) ka la aipor ïa ka Sorkar Jylla ban weng ïa ka Entry Tax Gate ba la buh da ka KAAC ha ka shnong Khanduli hapoh 10 sngi bad ha kauh ka por ka seng ka la pynpaw ruh ba kam banse ban mudui sha ka Meghalaya Human Rights Commission (MHRC) halor ka jingshah lehbeiñ jong ki paid Khasi-Pnar ha ki Karbi kiba ju khanglad ïa ki Khasi-Pnar ban leit iew leit hat bad ban leit wad jingsumar sha ki jaka ai jingsumar kiba don ha Meghalaya.