Jowai, Naitung, 06: Ka Shad Ñiam Behdieñkhlam kaba dei kawei na ki Shad Ñiam ba paw nam ka Ri Lum Jaiñtia bad ka nongrim jong ka ka long ban pyndep ïa ka Kular jong u Trekirot shisien shisnem ha ryngkat ka lehñiam leh rukom bad ka shad ka kmen.
Ha une u snem hapoh ka Raij Jwai ïa kane ka Shad Behdieñkhlam yn sdang naduih ka 11 tarik July bad kan kut pat haka 14 tarik July 2025.
Ka Dorbar Chnong Loomkyrwiang hapoh ka jingpeit jingpynïaid ka Social Committee bad Behdieñkhlam Committee kum shi bynta ka jingpynkhreh ïa ka jingwan jong ka Shad Ñiam Behdieñkhlam hapoh ka Raij ka shnong bad ha ka thong ban wanrah ïa ka khuid ka suba ka shnong ka dong ha ka 5 tarik July 2025, kala pynlong ïa ka Behdieñkhlam Cleaning Drive ne ka sngi kyrpang ban ïamih paidbah ha ka ban pynkhuid pynjngiar, pynphuh pynphieng ïa ka shnong ka thaw.
Ha kane ka Cleaning Drive ki nongshong shnong ki la mih ban ïashimbynta shitrhem ha ka ban lum, pynkhuid bad sait ïa ki umbam umdih, ki lynti syngkieng ba don hapoh ka shnong ka dong.
Na ka liang ka Dorbar Chnong Loomkyrwiang da ka jingsngewkhia ïa ka khuid ka suba bad ka shongsuk shongshngaiñ jong ka shnong ka dong, ka la kyrpad ïa ki lok ki jor najan najngai kiba wan ban shong ban sah ne kiba ïaid ba ïeng lyngba ka shnong ba kin ïatreilang bad ka Dorbar Chnong ha kaban wanrah ïa ka khuid ka suba da kaba phikir na ka jingbret pathar ïa ki jaboh jabaiñ kat shaba lap bad ruh ym ban leh kino kino ki kam kiba long pyrshah ïa ka aiñ Briew aiñ Blei.
