Shwa ka Christmas, pynkut ka Seng Samla Katholik ïa ka lympung kynduh lang ki 21 tylli ki Balang Shnong ha Parish Hall Nongpoh

Nongpoh, Nohprah 16: Shwa ban rakhe ïa ka Christmas bad ban pdaing ïa u snem ba thymmai, ka Seng Samla Katholik, Sub District Nongpoh jong ka Nongpoh Parish ka la pynkut noh ïa ka lympung ïa kynduh lang jong ki 21 tylli ki Balang shnong kaba la sdang ha ka 13 tarik u Nohprah 2024 bad la pynkut noh ha ka 14 tarik u Nohprah 2024 ha Parish Hall, Nongpoh.
Ïa kane ka lympung ïakynduh lang ki khun samla ha ka jingïalam u President u Bah Jona Ryntathiang lem bad ki nongïalam la wan ban pynhap pyrda da u MLA ka Nongpoh, u Bah Mayral Born Syiem kum u kongsan bad la sakhi lang da ka jingdon lang u MDC u Bah Balajied Rani kum u symbut kongsan, ha ryngkat ka jingdon lang u Br. Quirinus War, Sr. Magret Kharmuti, Katekis Silarius Lyngdoh lem bad ki Nongïalam ka Sub-District.
Kum ban pynpaw, ka Seng Samla Katholik, Sub District Nongpoh ka la pynlong ïa kane ka jingïakynduh lang jong ki 21 tylli ki Balang Shnong, ka dei ka jingthmu ban wan rah ïa ka jingïatylli kum ki khun samla hapoh ka Balang bad ruh kum ki khun samla kin jan sha u Blei bad kin kiar na kiei kiei ki kam jong kane ka pyrthei ba bunsien lada ki samla kim jan sha u Blei kin sakma ha ka jingim.
Ha kane ka jingïakynduh lang, ka Seng Samla ka la pynlong ruh ïa ki jingïakop ba bun jaid kkum ka jingïakop pyni ñia, ka jingïakop kyntip ktien, ka jingïalehkai phutbol, mawpoiñ bad kiwei kiwei bad ha kaba kut kane ka jingïakop la sam ruh ai ki khusnam sha ki nongjop bapher bapher kane ka jingïakop jong kane ka lympung.
Na ka liang u Bah Mayrald Born Syiem kum u MLA ha kane ka sngi, u la ai ïa ki kyntien ban ai mynsiem ïa ki khun sala bad ruh ban pynshlur ïa ki samla ba kin leh ïa ka kam kaba bha tam ym tang ha ka kam ka jong u Blei bad na ka bynta ka imlang ka sahlang ba ki khun samla ki dei ki lawei jong ka ri bad ka jaid bynriew.