Shillong, K’Lyngkot 02 : Ki kyrtong MDC jong ka Congress na KHADC kiba la paw kyrteng ha ka thup ba nyngkong, ha ka sngi Palei ki la kynduh lang khrui ha Congress Bhavan ban ïa syllok lang para kyrtong ha shwa ba kin leit sha u paidbah ban pan jingkyrshan.
Ka bynta kaba hakhmat jong ka jingïakynduh lang ka long ban ïa mir jingmut halor ki mat bad ki ishu kiba kum ka party kan rah sha u paidbah ha kane ka elekshon MDC kaban sa long ha ka 21tarik u Rymphang mynta u snem.
“Sngewtynnad ba na kane ka jingïasyllok lang para kyrtong ngi ïoh ban sngewthuh khambha ïa ki mat bad ki ishu kiba ïadei bad ki paidbah katkum ka jingïaid ka por,” ong uwei na ki kyrtong haba kren bad u Mawphor.
U la pynpaw ruh ïa ka jingsngewkmen kaba khraw ba ha ka thup kyrteng kaba nyngkong jong ka party, ki la ïoh ban don lut naduh ki kyrtong kiba dang khie samla kiba la rangbah bad don ruh kiba la shemphang bha ha ka saiñpyrthei la ka long ha ka jylla bad khamtam eh ha KHADC.
La pyntip ruh ba ïa ka thup kyrteng kaba ar ka party kan sa pyllait ha ka 08tarik mynta u bnai.
Ki 15 ngut ki kyrtong ba la pynbna ha ka thup ba nyngkong ha KHADC ki kynthup ïa u Dominic Mynsong na Mawhati, Rocky A Marwein na Umsning, Jonathan Syiem na Sohryngkham, Hilarius Warbah na Mawkynrew, Astarland Khyllep na Shella, Banphiralang Basaïawmoit na Mylliem, Allan Victor Lyngdoh na Nongthymmai, Manuel Badwar na Laitumkhrah-Malki, Pynshngaiñlang Syiem na Mawkhar-Pynthorumkhrah, Gerald Shullai na Jaïaw-Mawprem, Wanseng Jyrwa na Mawlai, Nathaniel Rymmai na Nongspung-Sohiong, Lawanpynshngaiñ War na Mairang-Nongkhlaw, Bormanding Nonglang na Rambrai Jyrngam bad Medal Sing Lyngdoh na Mawkyrwat.
