Artatien ki party ban sei kyrtong na baroh 29 constituency ha KHADC – JHADC

Shillong, K’Lyngkot 02 : Watla ka elekshon MDC ka sah sa tang kumba 50 sngi ban poi sha ka sngi thep vote kaba la buh ban long ha ka 21tarik Rymphang, 2025 hynrei la ïohi pat ba bun ki party kim pat lah satia ban pynbna lut ïa ki kyrtong ha baroh ki 29 constituency, kata ha KHADC bad kumjuh ruh ha JHADC.
Tad haduh mynta hi dei tang ka Voice of the People’s Party kaba la dep ban pynbna ïa ki kyrtong ha baroh ar tylli ki District Council. Ha kiwei ki party pat watla ki don kiba la pynbna ïa ka thup kaba nyngkong bad ba ar hynrei don pat kiba ym pat pynbna satia ïa ki kyrtong.
Lada phai sha ki party kiba don ha ka sorkar synrop jong ka Meghalaya Democratic Alliance (MDA), ka National Peoples’ Party (NPP) kam pat lah ban pynbna lut ïa ki kyrtong ha baroh 29 constituency wat hadien ba ka la dep ban pyllait arsien ïa ka thup kyrteng.
Halor kane, u Working President ka party Bah Hamletson Dohling u la ong ba ka jingslem jong ki ban pynbna lut kadei namar don ki constituency kiba hap ban ïa syllok bha na ka daw ka jingbun ki kyrtong kiba pan tiket.
“Ngi khmih lynti ba shen hi ngin sa lah ban pynbna ïa ka thup kyrteng kaba khatduh,” u la ong. Tangba la sngewthuh pat ba kane ka party kan ym pynïakhun lut ha baroh 29 tylli ki constituency jong ka KHADC.
Haba phai pat sha ka UDP, kane ruh ka la jia kumjuh kumba long ïa ka NPP. Kane ka party ruh dang shen ka la pyllait ïa ka thup kyrteng kaba ar hynrei hangne ruh kam pat lah ban pyllait lut. “La kumno kumno ha ki shi taiew ban wan ngin sa lah ban pynbna lut ïa ka thup kyrteng kiba dang sah,” ong u President, Bah Metbah Lyngdoh.
Na ka liang ka Congress ruh kumba long haduh mynta kam pat pynbna lut ïa ka thup kyrteng baroh ha baroh ar tylli ki constituency. Na ka liang ki nongïalam ka party ki la pynpaw ba katei ka thup kyrteng jong ki 15 ngut na KHADC bad 11 ngut na JHADC ki dei tang ka thup kyrteng ba nyngkong katba ïa ka thup kaba bud kin sa pynbna shen ha u Kyllalyngkot.
La ïohi ruh ba na ka liang ka HSPDP kumjuh na ka KHNAM ruh ki la dep ban pynbna ïa ki kyrtong jong ki. Kaba dang sah mynta kadei sa tang na ka liang ka BJP ban pynbna ïa ka thup kyrteng. “La kumno kumno ha ka taiew ban wan ngin sa lah ban pynbna noh ïa ka thup kyrteng jong ki kyrtong namar haduh mynta ngi hap hap ban bishar bniah bha shwa ïa ki kyrtong,” ong ki nongïalam na ka BJP.
Na ka liang u Mawphor haba ïoh ban ïa kren bad bun ki nongïalam jong kine ki seng sainpyrthei bapher bapher ki la kam beit ba ka elekshon MP bad ka elekshon MLA bad MDC ka ïapher baklybak.
“Ha ka elekshon MP ha ka Shillong Seat baroh 36 tylli ki constituency MLA bad 58 tylli ki MDC Constituency ki jied beit tang uwei u MP. Hynrei ynda la poi pat ka elekshon ha ki MDC constituency ki nongkyrshan kin hap jied ïa u kyrtong katkum ka jingibit jong ki,” ong u nongïalam ka Congress.
U Nongïalam ka NPP pat u la ong ba lada phai sha ki MDC ne MLA constituency ki paidbah kin peit bad jied ïa u nongmihkhmat uba lah ban trei bad uba ki lah ban shaniah bad khamtam eh uba ki lah ban kynduh ha kano kano ka por khamtam haba ki don ha ka pang ka shitom bad ka jynjar.
Lah ban kdew hangne ba ha ka elekshon MP, u kyrtong ka VPP, Dr. Ricky J Syngkon u la ïoh ban tam bun bha ïa u kyrtong ka Congress kumjuh ïa ka kyrtong jong ka NPP.