Mairang, Jylliew, 08: Ka Ophis jong ka Deputy Commissioner, Eastern West Khasi Hills District, ka la pynlong ïa ka Drawing bad ka Quiz Competition na ka bynta ki khynnah skul na ki skul bapher bapher hapoh ka district, kum shi bynta ban rakhe ïa ka sngi World Environment Day 2025 halor ka phang “Ending Global Plastic Pollution.”
La pynlong ïa kane ka jingrakhe ha Multipurpose Hall jong ka DC’s Office ha Mawsawa, Mairang. Kiba la ïadonlang ha kane ka sngi ki long u Additional Deputy Commissioner, Bah A.Nongbri, BDO Mairang Block, Kong L.R. Hynñiewta, Assistant Commissioner, Bah L.Myrthong, ryngkat lang kiwei ki ophisar sorkar, ki nonghikai, ki khynnah skul bad ki kmie ki kpa.
Kumba 11 tylli ki skul na kylleng ka district ki la wan ban ïashim bynta ha kane ka jingïakop. Ha ka Drawing Competition, ka Sanova Marngar jong ka St Joseph Hr Sec School ka la jop ïa ka kyrdan kaba nyngkong, ha ka kyrdan kaba ar la ïoh da ka Esarhadon Rani na Pyndengumiong Pres Sec school bad ha ka kyrdan kaba lai la ïoh da ka Eliana Joane jong ka Mairang Vidyajyoti Inclusive Sec School.
Katba ka St Thomas Hr sec school ka la jop ha ka kyrdan kaba nyngkong ha ka Quiz Competition, ka Mairang Vidyajoyti Inclusive Sec School ha ka kyrdan kaba ar bad ka Laitdom Pres SS ha ka kyrdan kaba lai.
La pynkut ïa kane ka sngi da ka jingsam ïa ki khusnam bad ki certificate sha ki nongjop bad sha baroh ki nongïashim bynta kum ka dak ban ithuh ïa ka jingïashim bynta jong ki.
