Mawkyrwat, ‘Nailar 30: Ka jingrakhe ïa ka ‘National Sports Day 2023’ ba la pynlong da ka ophis jong u District Sports Officer (DSO), South West Khasi Hills District ba la pynlong hapoh madan Artificial Turf, MDSA, Nonglang, South West Khasi Hills District ka la long kaba shongshit bad i shongkun bha ha kaba haduh 600 tam ei ei ki khynnah skul ki la wan ïashimbynta.
Kumta ban rakhe ïa kane ka sngi ba kyrpang, ka ophis u DSO, South West Khasi Hills District ka la pynlong ïa kane ka lympung ïalehkai kaba la khot ka ‘2st Inter – School Invitation Mawpoiñ & Tug of War Competition 2023’ ka long kum ka dak jong ka jingïasnohktilang bad ka Ri India baroh kawei ha ka jingrakhe ïa ka sngi kyrpang jong u Major Dhyan Chand uwei na ki khlur ïalehkai hockey jong ka Ri.
Haba phai ha ka jingïalehkai, na ka liang ka ophis jong u District Sports Officer (DSO), South West Khasi Hills District ka la ïoh ban khot haduh 600 tam ki khynnah skul ha kaba 17 tylli ki kynhun na ka liang ki khynnah kynthei bad 16 tylli na ka liang ki shynrang.
Ki kynhun kiba la poi sha ka thong jong ka jingjop ha ka jingïalehkai Mawpoiñ ki long ha ka liang ki shynrang la jop da ka Modern Academy Higher Secondary School, Rangmaw da 47 la 43 poiñ pyrshah ïa ka Phlorosy Dew Secondary School, Nonglang katba jong ki kynthei pat la jop ka Little Star Higher Secondary School, Mawkyrwat da 42 la 25 poiñ pyrshah ïa ka Nonglang Secondary School, Nonglang.
Katba ha ka jingïalehkai ïa kop tan tyllai ne Tug of War pat ki long ka Nativity Higher Secondary School, Mawkyrwat ka la jop ïa ka Little Star Higher Secondary School, Mawkyrwat kaba dei jong ki kynthei. Nangta, ha ka liang ki shynrang pat ka Nativity Higher Secondary School, Mawkyrwat ka la jop pyrshah ïa ka Rangthong Christian Higher Secondary School.
U bah T. Lyngwa, IAS, Deputy Commissioner, South West Khasi Hills District, haba kren kum u kongsan u la ong ba ryngkat ha baroh kawei ka Ri la rakhe ïa kane ka National Sports Day bad ha kane ka dong ka thaiñ bad la jied ïa ka Mawpoin bad Ïa-tan-tyllai kiba long ki jingïalehkai kiba kham pher bad kiba la rim da ka jingthmu ban kham pynbha bad pynkhie im biang ïa ki. U la ai mynsiem ïa ki khynnah ban pynmlien ban ïaleh ïa kine ki jingïalehkai khnang ba kin ïoh ïa ka jingjop. Ha kajuh ka por u la pynshlur ban shim khia ha ka jingïalehkai namar ym tang ba ka pynkhlaiñ ïa ka met ka phad hynrei ka ïarap ban pyllait ïa ki na ki jingmlien kiba sniew. U la ïaroh ïa ka jingtrei shitom jong ki nonghikai kiba la shimkhia ha kaba kyntiew ïa ka jingïalehkai sports ha kane ka dong ka thaiñ bad u khmih lynti ba da ka jing don bun ki nongïashimbynta ha kine ki jingïalehkai yn lah ban pynkhie im pat ïa kine ki jingïalehkai kiba la rim bha.
Ïa kane ka lympung ïalehkai ba ar sngi, la pynhap pyrda noh da ka jingïadonlang u bah Damang Synkon, District Sports Officer (DSO), South West Khasi Hills District, ki ophisar sorkar, ki nonghikai bad ki khynnah skul.
