Shongshit ka jingrakhe ïa ka ‘National Sports Day 2024’, 18 tylli ha ka Mawpoiñ bad 8 tylli ha ka Tan-Tyllai

Mawkyrwat, ‘Nailar 29: Kum ka dak jong ka jingkynmaw burom ïa u Major Dhyan Chand uwei na ki khlur ïalehkai hockey jong ka Ri, da kaba rakhe da ka National Sports Day 2024, ka ophis jong u District Sports Officer (DSO), South West Khasi Hills District ryngkat ka District Hub for Empowerment of Women, South West Khasi Hills District mynta ka sngi ka la pynlong da ka lympung ïalehkai kaba la tip kum ka 3rd Inter School Mawpoiñ & Tug of War ha madan Artificial Turf, MDSA, Nonglang, South West Khasi Hills District.
Ha ka jingïalehkai Mawpoiñ kaba dei jong ki kynthei la rah da ka Hilland Presbyterian Upper Primary School ka la jop da 40 la 27 point pyrshah ïa ka Christian Principles Academy Secondary School, Mawkyrwat. Katba ha ka liang jong ki shynrang pat la jop da ka Modern Academy Higher Secondary School, Rangmaw da 75 la 38 poiñ pyrshah ïa ka Christian Principles Academy Secondary School, Mawkyrwat.
Ha ka jingïalehkai tan-tyllai jong ki kynthei ka Nativity Higher Secondary School, Mawkyrwat ka la jop pyrshah ïa ka Jingïaseng Kynthei Mawkyrwat Presbytery Higher Secondary School, Mawkyrwat. Nangta ha ka liang ki shynrang pat la jop da ka Jingïaseng Kynthei Mawkyrwat Presbytery Higher Secondary School, Mawkyrwat pyrshah ïa ka Nativity Higher Secondary School, Mawkyrwat.
Kiba la wan ïashimbynta ki long ha ka Mawpoiñ 18 kynhun bad ha ka jingïakop tan tyllai ki don haduh 8 kynhun.
Kiba la ïa donlang ha kane ka sngi ki long naduh u bah D. Synkong, District Sports Officer, South West Khasi Hills District, u bah A. Wanbah, Border Area Development Officer, Ranikor C&RD Block, u bah E. Tariang, District Social Welfare Officer, South West Khasi Hills District, ki nonghikai, ki khynnah skul lem bad kiwei de.