Shillong, K’lyngkot, 14: “To ngin ym sngewthait ban leh ïa kaba bha; lada ngim leh swai, ha ka ïa kaba biang ngin sa ïoh la ka bainong Gal 6:9” ka dei ka phang pdeng jong ka lympungbah jong ki samla ka ICYM Zone-V ïa kaba la pynlong ha Holy Cross, Parish Mawkynrew.
Ïa ka lympung jong ki samla kaba saw la shim bynta da ki samla na ki saw tylli ki parish kaba kynthup ïa ka Parish Mawryngkneng, Laitkor, Jongksha bad Mawkynrew ha ka jingïalam jong u Sohblei Sylvester Synrem uba long u Spiritual Director jong ka Zone-V bad u President u samla Ïaiteinam Kharumnuid.
Da ki hajar ngut ki samla ki ïoh bynta naduh ka Mass Bakhuid ba la pynmynta da u Vicar General jong ka Shillong Archdiocese u Sohblei Richard Manbha Majaw ba la synran lang da u Sohblei Sylvester Synrem Spiritual Director, u Parish Priest u Sohblei John Balen ka Holy Cross Parish Mawkynrew bad kiwei pat ki Lyngdoh Sohblei.
U Sohblei Richard Manbha Majaw haba ai jingkren ha ka prokam nohphai sngi u la pynsngew sha ki samla jong ka Balang ka dei ïa ka mynsiem shitrhem jong ki namar ki samla ki long ka IingMane jong ki lyngba ki kam ba ki leh ban ïalap ïa ka Ktien U Blei.
U la sneng ïa ki samla da kaba ong ba ka Balang ka donkam ïa ki samla. U la bynrap ruh ba ka Balang kam dei ka Iingmame kaba dei da ki maw ne ki jingtei maw hynrei ki long ka Dohnud ha ka jingim babha.
Ka ICYM Zone 5 kaba lum ïa ki samla kum ka jinglong kawei lyngba ki jingpyni sap bad ki jingrwai ïaroh bad ka jingïaphylliew ïa kum ki samla.
La pynkup burom ruh ha kane ka sngi ïa ki samla kiba la noh syniang ïa ka seng bad ha ki kam synniang ha ka imlang ka sahlang.
La pynshongshit ïa ki samla ha kane ka lympung da ka kynhun ‘La Syrdeng’ na Mawryngkneng Parish da ka phawar jong ki.
La pynkut noh ïa ka Lympung da ka jingpynhiar lama ryngkat ka jingrwai ïa ka Anthem jong ka seng. U Spiritual Director u la pynbna paidbah ba ka Lympung kaba 5 kan long ha Parish Laitkor jong u snem 2026 bad la aiti ïa ka lama jong ka Zone sha u President jong ka Seng Samla Laitkor.
