Khliehriat, K’lyngkot, 21: Da ka jingïasnohkti lang bad kiwei ki district jong ka jylla, ka East Jaiñtia Hills ruh ka la rakhe ïa ka jingdap 53 snem ka jingioh ïa la ka jong ka jylla ba pura ne ka ‘Meghalaya Day’.
Ha ka jingïalang kaba la long ha Conference Room jong ka ophis u Deputy Commissioner la iadon lang u Deputy Commissioner u Shivansh Awasthi, u Superintendent of Police u Giri Prasad, ka Additional DC Kong J.U Kharpuri bad Bah G. Warjri, Assistant Commissioner ka Kong F. Wann bad kiwei pat ki heh ophisar, ki nongsynshar shnong bad ki samla pule.
Ha ka jingkren, u Deputy Commissioner u la pynpaw ïa ka jingkongsan jong kane ka sngi namar ka pynkynmaw ïa uwei pa u wei u nongiashim bynta ha ka jylla ïa ka jingnoh synniang kaba khraw tam kaba la noh synniang da ki kpa tymmen kiba la trei shitom na ka bynta ban pynlong ïa ka Meghalaya kum ka Jylla kaba pura.
U la ong ruh khnang ban pynlong ïa ka jylla Meghalaya ka jylla kaba kiew shaphrang, uwei ba uwei u nongshong shnong u donkam ban bishar bniah ia lade ïa kaei kaba la leh ha kine ki 53 tylli ki snem kiba la leit noh, bad u la pynshlur ruh ïa ki ophisar sorkar kiba don ha kane ka sngi ba kin bteng ban shim ïa ka jingkitkhlieh ha la ki jong ki kyrdan na ka bynta ban kyntiew ïa ka roi ka par jong ka Jylla Meghalaya.
U Shivansh haba pdiang ïa ki jingkongsan jong ka jylla bad ka thaiñ hi baroh kawei, u la kyntu ïa ki nongshong shnong jong ka district ban shim kabu ïa ka rukom kyrshan da ka sorkar da ka jingthmu ban kyntiew ïa ka jinglong jingim jong ki wat kumba u la pynpaw halor ki katto katne ki ki jingthmu ba la shim da ka sorkar jylla na ka bynta ban kyntiew ïa ka jylla ha kaba ïadei bad ka pule puthi, ka koit ka khiah bad kiwei kiwei.
U Giri Prasad ha ka jingkren u la ïaroh ïa ka jinglong kyrpang jong ka jylla Meghalaya bad u la pyrto ruh halor ka jingriewspah ha ka kolshor ka riti dustur bad ka pateng jong ka jylla.
U la kren ruh shaphang ka kolshor kaba kyrpang ha kaba la ai burom haduh katta katta ïa ki kynthei ha ïing ha sem bad ka imlang sahlang.
Ka Kong J.U Kharpuri ha ka jingkren ka la pynpaw halor ka jingkongsan jong kane ka sngi da kaba ban jur ruh halor ka jingdonkam ban pynneh pynsah ïa ka kolshor ba kyrpang jong ka Meghalaya.
La pynphuh pynphieng ia kane ka sngi da ki prokram bapher bapher kaba kynthup ïa ki jingshad kiba pyni ïa ka kolshor, ki jingrwai ba la rwai da ki kynhun bapher bapher na ka district bad kiwei kiwei.
