Nga mih ha kane ka elekshon ban ïada ïa ka ri bad ka jaitbynriew, ong u Bah Juban

Shillong, K Lyngkot, 20: U kyrtong jong ka Hill State Peoples Democratic Party (HSPDP) Bah Jubanlang Kharbihkhiew uba ïakhun na Mawkhar-Pynthorumkhrah Constituency ha ka Lah Sngi u Blei u la ong ba ka jingaireng jong u ha ka elekshon MDC sha ka KhADC ka dei na ka bynta ban ïada ïa ka ri bad ka jaitbynriew na kiba bun ki jingshah banbeiñ.
Haba ïakren bad u nongthoh khubor u Bah Juban u la ong, “ka dawbah jong kane ka jingmih ïakhun ha kane ka elekshon ka dei hi ha ka dawbah jong ka ri bad ka jaitbynriew.”
U la ong ruh ba la donkam ban ai ka jingïarap ïa ki samla ban ïeng ha la ki jong ki kjat. “Ka jingmih jong nga ha kane ka elekshon ka dei ruh halor ban pynneh pynsah ïa ki riti dustur bad kiwei kiwei,” ula ong.
U la kyntu ruh ïa ki samla ba kin long trai ha la ka jong ka ri bad ba kim dei ban shah pynïaid ha kiwei ki nongwei nongar.
Kum u nongsengkam lajong u la ïathuh ba u la ïalam ïa kiba bun ki samla ha kaba ïadei bad ka jingseng kam la jong bad kane ka long kaba kongsan bha ha kine ki por ba mynta.