Shillong, Nailar : Ka Sacred Heart Boy Higher Secondary School, Mawlai hynne ka sngi Balang ka la rakhe ïa ka jubili rupa ne jingdap 25 snem jong ka Science Stream hapdeng ka jingshongkun bad iphuh iphieng ha phyllaw jong ka skul ha ka jingdon ryngkat u MLA ka thaiñ bah PT Sawkmie kum u kongsan bad bah Teiborlang Pathaw, MDC kum symbud kongsan.
Ha kane ka sngi la pynkup burom ruh ïa ki nonghikai kiba la hikai palat ia ka 25 snem kiba kynthup ïa u babu Maurice Lyngdoh, babu Michael Swer, Donald Malngiang, Recanus Dula, ka kong Nancy Massar bad ka kong Rosana Kharmuti. La pynkup burom ruh ïa kiba wan top hapoh skul naduh ki por ba la leit, kiba la long MCS mynta bad kiwei, kumjuh ruh ïa kiba wan top 10 ha ka result ba dang shen.
Ha kane ka jingrakhe la ïa don lang ruh, naduh u principal jong ka Sacred Heart Boys HSS, phadar Alistair S. Marwein, u phadar reverend Provincial Ophindro Lyngkot, phadar Ioannis War Pakma, principal barim ka skul, ki kmie kpa bad ki khynnah skul.
Haba kren kum u kongsan u bah PT Sawkmie, u la pynpaw ba kane ka dei ka sngi kaba kmen bad basuk, ïa kaba ki la ïoh ban rakhe ïa ka jingdap 25 snem jong ka Science Stream hapoh kane ka skul.U la pyrto ïa ki nonghikai kiba hikai ïa ka Science ka ba dei kawei na ki sobjek ka ba kham shem shitom shibun.
Nalor kata u la ong ruh ban seng ïa ka Science Stream ka donkam ïa ka laboratory, ki kot kiba rem bad bun ki skul kim da kwah eh ban seng ïa ka Science stream namar ba ka bun jinglut palat. Hynrei u principal ba la leit u khlem da pyrkhat ïa ka jingmyntoi ban ïohnong bad u la shimkhia ban seng ïa ka Science stream hapoh ka skul, ong u bah PT Sawkmie.
Shuh shuh u la ïaroh ruh ïa ki nong pynïaid ha ka ba ïa dei bad ka jingkiew jong ka skul da ka ba ong kine baroh ki la jia namar ba ki nong pyniaid ki dei ki briew kiba wad ïa ka khmat jong U Blei.
Kumjuh na ka liang u Bah Teiborlang ruh u la pynpaw ka jingsngewkmen ban don bynta bad ka jingrakhe ïa ka jingdap 25 snem ka Science Stream bad u la pyrto ruh ïa ki nonghikai kiba la shakri palat 25 snem ïa ka skul.
Haba kren shaphang ka Science, u bah Teibor u la pynpaw ba ka pyrthei ka shlei da ki gadget bad machine, baroh dei na ka Science. U ong ruh ba ka Science ka la kham pynsuk ïa ka jingim jong ki briew bad da ka jingïarap jong ka Sciene la lah ban pynjan ïa ka lynti ïaid kaba jngai ba kan long kaba jan.Nalor kata u la pynpaw ba ka science ka la sdang na ki saikil sha ki thuk thuk, na ki saw shaka, sha ki rel bad ki liengsuiñ bad ka Science ka la pynpoi ruh ïa u khun bunriew sha u bnai.
Ha kane ka sngi la ïoh ruh ban ot ïa u cake dap 25 snem bad la ïoh ruh ïa ka jingkren na u babu Michael bad kiwei kiwei.
La pynshongshit shuh shuh ïa ka prokram da ka jingrwai haka ktien Khasi bad Garo, ki jingshad, ka put ka tem bad kiwei.
