Shillong, Jymmang, 28: Ki dkhot jong ka Jaiñtia Students’ Union (JSU) Seng Kmie ha ka sngi Balang ki la pynlong da ka jingïakhih shong kyllaiñ myngngor ha lad Kiang Nangbah Government College, Jowai ban pynpaw ïa ka jingpyrshah halor ka jingbym pat ïoh klas jong ki samla pule ka rilum Jaiñtia.
Katba ki dkhot ka JSU ryngkat ki samla pule ba dang duh klas bad ki kmie ki kpa ki dang pynlong ïa ka jingïakhih ba jaijai ki bor synshar ka West Jaiñtia Hills District lyngba u Additional SP West Jaiñtia Hills District ki la wan khot ïa ki nongïalam ka JSU) sha ka miej jingïakren.
Ha ka jingïakren, ki nongïalam ka seng ki la pynpaw hakhmat u Deputy Commissioner u AK Singh lada ki bor synshar district ki kular ban ai da ka jingthoh sha ka seng ban pynïoh klas ïa baroh ki samla, ka seng ka kloi ban pynsangeh noh ïa ka jingïakhih.
Ki nongïalam ka seng ki la pynpaw ruh ba kim sngewhun satia ïa ka jingkhot ïakren kyrkieh jong u Deputy Commissioner ban ïathir ïatai halor ka jingeh jong ki samla pule.
Shuh shuh ki nongïalam ka JSU ki la pynpaw ba kin dang ïai bteng ïa ka jingïakhih ha ki sngi ban dang wan katba kim pat ïoh ïa ka jingdawa.
Ki nongkren ha kane ka jingïakhih ki la pynpaw sha ka Sorkar ba ka dei ban shimkhia mardor ïa kane ka jingeh jong ki samla kaba pynduh jingkyrmen ïa ka lawei jong ki.
Ki don napdeng ki samla pule kiba pynpaw ka jingsngew diaw ba kim kotbor satia ban pule ha ki College ba la pynïaid da ki riewshimet hynrei ki la dawa ïa ka Sorkar ba kan thaw ïa ki lad ki lynti na ka bynta ban pynrung klas ha ka College sorkar.
