Nongpoh, Risaw 07: Hadien u lapbah uba la neh bun kynta bala ther haka thaiñ Ri-Bhoi, ka shnong Lumbyrhing, Pahamrïoh naduh hynnin ka miet kala mad ïaka jingshlei um hadien ba ka um kala sahkut ha surok bah National Highway naka jingsahkut ki jakhlia haki nala tuid um kaba la buh jingeh wat ïaka leit ka wan jong ki paidbah bad wanrah ruh ka jingdheng kali ba jur ha surok bah National Highway 6.
Kane ka jingshlei um kala sdang naduh hynnin ka miet ba ka um ka dang neh haduh mynta bad kaba sngewsangsot kila don ruh ki longiing kiba la shah ktah bad ka um kala rung haduh ïingshetja bad bun naki tiar ki tar, ki jaiñ ki nep, ki marbam mardih khamtam u khaw kila shah ktah naka jingrung ka umsaw shaduh iing.
Haba kren sha ki lad pathai khubor u Bah Banaijingsuk Khongdup Rangbah shnong ka Lumbyrhing u la ong ba kane ka jingshlei um kala sdang naduh hynnin ka miet ha kaba ka um kam lait shuh ban tuid namar ka jingsahkut naka jingther u lapbah bala neh bun kynta bad kane ka jingshlei um kala ktah jur ïaki nongshong shnong katei ka shnong ha kaba kila don ki longïing kiba la duh ruh wat
ki marbam mardih naduh u khaw bad kiwei kiwei namar ka jingrung jong ka um shapoh ïing.
Kum u Rangbah shnong u la kyrpad ruh ïaki bor ba dei peit ba kin shimkhia ban weng ïa katei ka jingeh jong ki paidbah nongshong shnong bad naka liang ki bor shnong ki dang ïaleh katba lah ban pynkhuid ïaki nala bad ban weng ïa katei ka jingshlei um ha katei ka shnong.
