Khyrwit ka Iingbishar HC ïa ka NHAI ba sniew palat pud ka surokbah NH-6

By Mawphor News Desk On Oct 8, 2023

Shillong, Risaw, 07: Ka Iingbishar High Court jong ka jylla ha ka sngi Palei, ka la khyrwit tyngeh ïa ka National Highway Authority of India (NHAI) namar ka jingsniew palat pud jong ka surok bad ka jingbym shim khïa ban peit bad pynbha ïa ka surok bah National Highway-6(NH-6)
Hadien ba ïohi ïa ki dur kaba pyni ïa ka jingjot rathai jong ka surok NH-6 ba dap da ki thliew ki syar, ka Iing Bishar ba kynthup ïa u Chief Justice Sanjib Banerjee bad Justice B Bhattacharjee kala ong “Kane ka dei ka bym lah ban pdïang ha ka Ri kaba la shai bad ka dei ka jinglehrain ba ka Iing Bishar kan hap ban pynkynmaw kat ïa ka NHAI ba kaei ka kam ba ka dei ban trei bad kiei ki jingkitkhlieh ba ka don”.
“Kumba ka long, ka jinglong jingman ki jaka ha Jylla ka long kaba eh ban ïakren bad ki jaka sha kyndong kynshrot ki shu ap ïa ka jingwan ki mar ki mata kiba kongsan. Ka jingpynpoi ïa ki mar ka thut noh da ka jingsniew palat ki surok khamtam ïa ka jinglong ka surok ha ki bynta ka Jowai-Ratacherra jong ka NH-6” kala ong haba bynrap “La kyrmen ba ka jingmaramot kan dep noh khnang ba kane ka bynta jong ka surok kan long ban ïaid kali noh hapoh une u bnai ban wan”.
Ka Iing Bishar kala ong “Ym dei ban ailad satïa ïaki surok ne Highway ha ka Ri ba kin poi haduh une u pud kumba long ka surok NH-6 na Jowai sha Ratacherra”.
Ka Iing Bishar kala bthah ruh ba nalor ka jingai khubor ka NHAI halor ki kam ba kala pyntrei bad pyndep, u Deputy Commissioner ka East Jaintïa Hills u dei ban file ïa ka kaiphod jong u ban pyntip ïa ka jinglong jingman kumba ka long jong ka ka surok NH-6 na Jowai sha Ratacherra.
Ka Iing Bishar kala bthah ruh ba ka Sorkar Jylla ka dei ban pyndep noh ïa ka jingmaramot ïa ka surok Jowai By-ass hapoh ka saw taiew ban wan namar ba ka lyiur kala sdang ban kut.
Ka NHAI kala pyntip ruh ha ka kaiphod ba kala dep buh da uwei u contractor naduh ka 29 tarik Nailur 2023 ban maramor ïa ka surok na Sonapur (km 141+500) sha Ratacherra (k m 171.455).
Ka kaiphod ka la pynpaw ruh ba u contractor ba la don lypa, un hap ban maramot ïa ka surok na Jowai (k m 69.20) haduh ha Sonapur (k m 141.50).