Tyrsad, Risaw, 02: Ki longkmie ka shnong Tyrsad-Umkseh hapoh ka lama ka Sarajanai Village Organization kaba kynthup ïa 13 tylli ki Self Help Groups (SHG’s) ki la rakhe ïa ka jingdap shisnem ka V.O., ha ka 1 tarik u Risaw, 2022 ha kaba ïa ka jingrakhe la pynlong ha ka iïngskul jong ka Seng Khasi Secondary School, Tyrsad-Umkseh.
U bah Lamphrang Blah, MDC ka thaiñ uba long ruh u shongknor ka KHADC u la long u kongsan bad ha ka jingkren jong u, u la ong ba ka jingdap shisnem ka seng ka long shisha ka jingjop bad ka pynklet ïa ki jingeh ba ki mad haba ki sdang ban pyntyllun ïa ka kam.
U bah Staising Kharbteng uwei na ki riew rangbah ba pawkhmat ka thaiñ ha ka jingkren jong u, u la pynpaw ba dei lyngba ka jingïohi jngai ki nongïalam ka Ri kiba la shimkhia ban pynkupbor ïa ki longkmie ba kin lah ban ïeng ha la ki jong ki kjat da kaba jingthaw ïa ka ‘National Rural Livelihood Mission’ (NRLM) hapoh ka Tnat Pynroi Nongkyndong ne Ministry of Rural Development ban kyrshan ïa ki Self Help Groups hapoh ka lama ki Village Organization ba ki longkmie ki sa ïoh ïa ka lad pyntyllun ïa ki kam ban seng ïa kum kine ki kynhun ki ban kyntiew ïa ka kamai kajih jong ki.
U bah Manikstar Umdor, Sirdar ka Pamsangut Sirdarship u la ong ba ki longkmie ki don ïa ka bynta kaba khraw ban saiñdur ïa ka imlang sahlang ha ka jingkiew shaphrang ha baroh ki liang.
Ha kane ka sngi la ïoh ruh ïa ka jingkren na u bah Shan Kharryngki, Assistant Rangbah Shnong ka shnong Tyrsad-Umkseh, u bah Simple Rani na ka liang ka Seng Samla, u bah Shalenstar Rani na ka KSU Tyrsad Umkseh unit, u bah Batkhraw Rani uba la kren na bynta u bah Wellbirth Rani, ka kong Erijoy Shylla na ka NRLM Mawphlang Block, ka kong Ibakordor Rynjah kaba la kren pdiang sngewbha.
Nangta, ka kong Midoris Umdor Secretary ka seng kaba la batai ïa ka jingtreikam ka seng ha lynti ïaid ba shisnem jong ka, ka kong Ritngen Umdor, Asst Secretary kaba la kren ai khublei. La pynïaid ïa ka jingïalang jong katei ka jingrakhe da ka kong Skorina Umdor, Vice President ka Sarajanai Village Organisation.
Kum ka dak ban rakhe ïa ka jingdap shisnem ka seng la ïoh ban ot ïa u cake da u bah Lamphrang Blah, MDC ka thaiñ uba long u kongsan.
La shongshit ïa kane ka jingrakhe da ki jingbyrngia na ki Self Help Groups kiba la ai ïa ki jingrwai, ki jingshad bad ki skit kiba kit jingmut ban ïatei ïa ka imlang sahlang.
