Shiteng miet ïakhih bad sangeh ïaid ki trok kit marbam, ba jur ka jingshah khrong pisa ha surok

Nongpoh, Naiwieng 01: Ki nongñiah trok kiba ju kit marbam ban pynpoi shaka jylla Meghalaya kila ïakhih bad sangeh ïaid syndon hynnin ka miet ha Jorabat, ba jur palat ka jingshah khrong pisa ha surok bah naduh Ri-Bhoi haduh nongbah Shillong.
Ka daw bala pynlong ïa kitei ki nongñiah trok ban sangeh shiteng lynti ka dei namar ba kim sngew lah bor shuh ban siew pisa ha shilynter jong u surok naduh Ri-Bhoi haduh Shillong, bad wat ki trok thylli ki wan na Shillong hadien ba kila dep pynhap ïaki marbam ruh ki shah pan pisa.
Katto katne ngut ki nongñiah trok kila pynpaw ruh ba kim sngew myntoi bad kim sngewlah shuh ban pynmih jakpoh, nalor ka umphñiang kaba rem bad ka bai kali kala hiar, ha kaba kim sngewlah shuh ban pynmih pisa ban pyndap ïaki jongdonkam ha iing ha sem.
Kila byrngem ruh ba lada katei ka jingshah khrong pisa kan dang bteng ha shilynter jong u surok naka liang jong ki, kim banse ban sangeh kamai bad ban nym pynpoi shuh ïaki marbam shaka jylla Meghalaya.