Nongpoh, Nailar, 27: Hadien baka samoi treikam jong ki nongïalam barim kala poi noh sha kaba kut, ka Western Ri-Bhoi Dorbar and Social Welfare Organization haka 26 tarik mynta u bnai kala ioh ban jied biang ïaki nongïalam ba thymmai, ban shimti ïaka kam ban ai ka jingshakri sha ki paidbah ka thaiñ Western Ri-Bhoi, bad napdeng ki 107 tylli ki shnong ha katei ka thaiñ kumba 57 tylli kila wan ban shim bynta haka elekshon ban jied ïaki nongïalam ba thymmai bala pynlong ha ïing Dorbar ka Western Ri-Bhoi Dorbar.
Ha katei ka jingjied ïaki nongïalam ba thymmai u Bah Najim Kharmalki u ba dei ruh u President ba rim ka Western Ri-Bhoi Dorbar u la shah pynliem noh ha u Bah Eniasroy Rani haka jingjied ïaka post President bala pynïaid da ki Presiding Officer bala jied da ka EC haka 9 tarik mynta u bnai kiba la shim ruh ïaka bynta ban pynïaid ïaka elekshon katkum ki kyndon bala buh.
Haba phai sha ka jingjied ïaki nongkitkam ba thymmai ha katei ka sngi haka post President ki kyrtong ki don 3 ngut ba kynthup ïa u Bah Najim Kharmalki, Bah Eniasroy Rani bad u Jobin Patho, hynrei u Bah Eniasroy Rani naka shnong Umsong u la jop ïaka Post President katba ïaka Post Secretary la jop da u Bah Langishkar Wahlang naka shnong New Jirang bad la ioh ruh ka jingai jingmut naki paidbah nong wan shong Dorbar ba ïaki post Vice-President yn jied da ka Voice Vote bad la mynjur lang ban jied ïa u Bah Centerwell Doloi naka shong Sohkyrbam Domphlang bad u Petalman Thangkhiew Sordar ka Patharkhmah kum ki Vice- President.
Nalor kitei ki nongïalam ba hakhlieh jong katei ka kynhun la jied ruh ïa u Bah Ambrose Doloi naka shnong Jereibasai kum u Assistant Secretary, Bah Ripolas Nongtri na Patharkhmah kum u Treasurer bad ar ngut ki Adviser ba kynthup ïa u Bah Esman Lyngdoh na Umkynsir bad Bah Najim Kharmalki na Patharkhmah lem bad 20 ngut ki EC member naki Circle bapher bapher ka thaiñ Western Ri-Bhoi.
Na ka liang kitei ki nongïalam ba thymmai naduh u Bah Eniasroy Rani bad u Bah Langishkar Wahlang kila pynpaw ka jingsngewkmen hadien ba kila shah jied kum ki nongïalam ba thymmai ban shimti ïaka lyngkor hadien bala pynlong daka elekshon kaba khuid ba suba bad kyrmen ruh ba kin ai ka jingshakri kaba bha tam naka bynta ki 107 tylli ki shnong haka thaiñ Western Ri-Bhoi bad kyrpad ruh ïaki paidbah ban ai ka jingïatreilang naka bynta ban saiñdur thymmai khamtam naka bynta ka bha ka miat bad ka roi ka par jong ki shnong katei ka thaiñ.
