Khliehriat, K’Lyngkot 27: Ki pulit jong ka Ladrymbai Outpost, East Jaiñtia Hills District, myn ha ka 20 tarik mynta u bnai ki la leit ban tam bad shimti ïa kawei ka met iap jong uwei u rangbah na kawei ka jaka kaba don ha khappud jong ka shnong Jalyiah bad Dkhiah, ki pulit ki dang pynlong ka jingtohkit halor kane.
La suba ba utei u briew u la shah pyniap dusmon ha ki runar bad ki la don ki dak mong ha ki bynta jong ka khlieh, halor kane ki pulit ki la register ïa ka ejahar ha Khliehriat Police Station, Case No. 12 (01) 2024 hapoh ki kyndon aiñ 302-34 IPC, hakhauh ka por ka tnat pulit na East Jaiñtia Hills ka la pyntip ruh sha ki heh jong ka Crime Scene Unit CID Shillong bad la pynlong shuh shuh ïa ka jingwad bniah bad jingtohkit, ka tnat pulit ka la pyndep ruh ïa ki kam kiba iadei bad ka aiñ bad ïa ka met la buh ha ka jaka buh met ïap ha Khliehriat Civil Hospital.
La ong ba utei u ba shah pyniap u don ha ka kyrta kaba hapdeng 28-29 snem kyrta, ka snieh doh ba lieh, ka jingjrong kaba 5.7 phut, u phong ka jaket rong ïong, ka T-shirt rong ïong-blue, ka patlun jean rong ïong bad ka patlun (track pant) rong jyrngam.
