Nongpoh, Ïaïong 11: U Bah Lamborlang Makri mynta ka sngi u la shah jied biang kum u rangbah shnong ba thymmai ka Shnong Umroi Madan, kaba dei hadien ba la pynlong da ka jingïajied paidbah, ba ki paidbah ka shnong ki la ibit biang ïa u ban shim ïa kane ka lyngkor nongïalam kum u rangbah shnong katei ka shnong Umroi Madan.
Ïa kane ka jingjied ïa u rangbah shnong bad kiwei ki nongïalam la pynlong mynta ka sngi ha katei ka shnong, ha kaba ïa ka kam rangbah shnong la ïakhun hapdeng u Bah Lamborlang Makri pyrshah ïa u Bah Sen Thabah bad ha kane ka jingjied ïa u rangbah shnong ba thymmai, ki paidbah ki la ibit biang ïa u Bah Lamborlang Makri ba un dang bteng kum u rangbah Shnong katei ka shnong Umroi Madan.
Haba jied ïa kane ka kam rangbah shnong, la sakhi lang ruh da ka jingdon lang u Syiem khynnah ka Hima Mylliem, ki myntri ryngkat ki rangbah na katei k Shnong Umroi Madan.
Hadien ba la shimti biang ku u rangbah shnong, u Bah Lamborlang Markri, u la ai khublei biang ïa ki paidbah kiba la ibit biang ïa u ban shim ïa kane ka lyngkor nongïalam kum uta u khliehduh ka shnong bad kane ka jingjop ha kane ka jingjied ïa kane ka kam rangbah shnong ka dei hi ka jingkyrshan bad ka jingieit ki riew rangbah jong kane ka shnong.
U la ong ruh kumba la pynkupbor biang ïa u ban bat ïa kane ka lyngkor rangbah shnong, u la kular ruh ban dang ai ka jingshakri kaba kham paka ïa ki paidbah bad ba ka bynta ka jingkiew shaphrang ka shnong u khot u wer ïa baroh ki paidbah nongshong shnong ban ai ïa ka jingïatrei lang khnang ban lah ban kyntiew ïa ka bha ka miat bad ka roi ka par jong ka shnong ka thaw hi baroh kawei.
