Shimkhia ïa ki 18 tylli ki shnong ha Raid Nongtung : dawa ka RBPC
“Ka seng ka tip shai ruh ba wat kito ki shnong ruh kim kwah satia ban leit sha ka jylla Assam bad ki kwah hi ban don sha ka jylla Meghalaya bad ha kane ka jingïapynbeit pud ka sorkar Meghalaya lyngba ki Regional Committee ki dei ban da tih bniah shuwa ban shim ïa ka rai katkum ki kot ki sla ne jingshisha kiba dei naduh kulong kumah”
![](https://mawphor.com/wp-content/uploads/2022/07/mawphor-1.jpg)
Nongpoh, Naitung 24: Ha kane ka jingïapynbeit pud pynbeit sam hapdeng ka sorkar Assam bad ka sorkar Meghalaya kaba dei ruh ha ka wat kaba ar, ka Ri Bhoi Peoples’ Council (RBPC) ka la kyntu jur ïa ka sorkar Meghalaya ba ki 18 tylli ki Shnong ba hap ha ka Raid Nongtung ha ka thaiñ Block II, ki dei ban hap sha ka jylla Meghalaya bad ym ban pyngngat ïa ki sha ka jylla Assam.
Haba ïa kren bad ki Nongthoh Khubor, u Convener ka RBPC, u Samla Jason Lennox Nongrum u la ong ba ka seng ka la ioh jiingtip ba hapoh u pud u sam ka Raid Nongtung ki don haduh 34 tylli ki shnong, hynrei napdeng kitei ki 34 tylli ki shnong la pynhap ba ki 18 tylli ki shnong ki dei kiba dang don ka jingïakajia pud hapdeng ka Assam bad ka Meghalaya bad katkum ka jingshisha kitei ki 18 tylli ki shnong ruh ki dei kiba hap sha ka Jylla Meghalaya katkum ki kot ki sla ne katkum ki jingshisha naduh kulong kumah.
U la ong ruh kumba la ioh lum jingtip da ka Seng, kitei ki 18 tylli ki shnong ki dei hi ki shnong ba bun da ki jaid byrniew Khasi suda naduh kulong kumah ha kaba ïa ka khyndew ka shyiap la long trai da ki Khasi bad ki hap ruh ka jingsynshar hapoh ka Raid Nongtung jong ka Hima Khyriem Syiemship, hynrei kane ka jingkynnoh ba kitei ki shnoing ki hap ha ka jingïakajia pud hapdeng ka Assam bad ka Meghalaya ka dei tang ki kam buittuh ka sorkar Assam.
“Ka seng ka tip shai ruh ba wat kito ki shnong ruh kim kwah satia ban leit sha ka jylla Assam bad ki kwah hi ban don sha ka jylla Meghalaya bad ha kane ka jingïapynbeit pud ka sorkar Meghalaya lyngba ki Regional Committee ki dei ban da tih bniah shuwa ban shim ïa ka rai katkum ki kot ki sla ne jingshisha kiba dei naduh kulong kumah” ong u Samla Jason Lennox Nongrum.
Shuh shuh, u la ong ruh ba ka seng kam kwah ba kane ka jingïapynbeit pud ha ka wat kaba ar kan long kum ha ka wat kaba nyngong ba bun ki jaka jong ka Meghalaya ka la leit sha ka jylla Assam bad ha kane ka wat kaba ar, ka sorkar Meghalaya kam dei ban shu shim rai kyrkieh dei ban da bishar bniah ïa ki kot ki sla, ka jinglong jingma jong ki paidbah, ka jingsngew jong ki paidbah ha kitei ki shnong khappud, namar katkum ka jingshisha kitei ki 18 tylli ki shnong kim dei satia kiba hap sha ka jylla Assam bad ki dei hapoh ka jylla Meghalaya bad la shu pynhap jubor kum kata ka jaka ba ïa kajia pud hapdeng ka Assam bad ka Meghalaya katba kiba bun ki nongshong shnong ki dei na ka jylla Meghalaya, u la bynrap.