Jowai, K.Lyngkot 16: Ka Sister Ardaka Tariang ha ki bun snem kum ka Aspirant jong ka jingïasyllok ki Sister Carmelite Missionary, khatduh ka la raikut bad shim ïa ka jingsmai kaba khatduh bad ka la pyndep ïa kane ha kane ka 6 tarik Kylla-lyngkot 2024,ha ka ban ieid bad shakri ïa U Blei bad ïala ki para briew shi jingim ban long ka riewñiam jong ka jingïasyllok ki Sister Carmelite Missionary ha Sacred Heart Churh Church Raliang ka Parish Mowkyndeng (Mookyndeng) bad ïa kane la wan ban pynsmai da u Most Rev. Ferdinand Dkhar dd Bishop ka Jylla-ñiam Jowai, ha kaba la ïa wan ban sakhi da ki spah ngut ki para Khristan. Ki Kur ki Jait bad ki Kha ki Man (jong ka Sister Ardaka Tariang) kiba najan bad na jngai.
U Most Rev. Ferdinand Dkhar, haba kren ha kane ka sngi, u pynpaw ïa ka jingkmen ka bakhraw ia ka jingshim smai jong ka Sister Ardaka Tariang ban long ka ‘riewniam shi jingim ha ka ban ieid ban shakri ïa U Blei bad iala ki para briew. U Bishop Ferdinand u ong ba kane ka jingshim rai kaba khatduh jong ka Sister Ardaka Tariang ban ieid ban shakri ïa U Blei bad ïala ki para briew, ka dei ka jingkwah jong U Blei bad ka Balang. Nangta u ong, ka Balang ka kwah ïa ki riewngeit jong ka ym tang ki riew shakri paidbah, ki Doctor, ki Nonghikai, ki Nongtrei Sorkar bad kiwei de ki jingtrei ba bun jait, u kwah ruh ïa ki riewñiam, ki Phadar, ki Sister, ki Brother bad kiwei de ki riew aiti lut ha ka ban shakri ïa U Blei, ïala ki Parabriew bad ha kaba pynphriang ïa ka Khubor babha jong u Jisu Khrist sha ki jaitbynriew baroh kat shaba lah ei. Ha ka juh ka por u Bishop u ong ka jingim riewñiam ka long kaba eh, hynrei shañiah ha U Blei bad ha U Blei ka long kaba lah bad ym don ka bymlah ha U Blei.
U Bishop Ferdinand Dkhar u ong ka Balang ka donkam ïa ki riew aiti lut ban shakri ïa U Blei, ïa ki riewngeit jong ka Balang jong u bad ïala ki parabriew, u pynkut ïa ka jingkren jong u da kaba kyntu ïa ki khun samla shynrang bad ïa ki khun samla kynthei jong ka Balang bad ïa ki kmie ki kpa ban pynshlur ïala ki khun ban long ki Lyngohsohblei, ki Riewñiam bad ki Brother ba kin mih sha khmat ban long ki Lyngdohsohblei, ki riewñiam bad ki Brother, ki Headkatechist bad ki Nongtrei Balang kiban long ki riew aiti lut ha ka ban pynphriang ïa ka Khubor babha ha ki briew baroh bad ha ka ban shakri bad sumar ïa ki paidriewngeit bad ïala ki para briew kat shaba ki don katba lah ei.
Ha kane ka sngi la ïoh ruh ïa ki kyntien kyrkhu kyrdoh ïa ka Sister Ardaka Tariang da u Phadar Henry Warbah Parish Priest ka Parish Mowkyndeng (Mookyndeng) bad na ka Sister Superior jong ka Seng ki Sister Carmelite Missionary.
