Nongstoiñ, K’lyngkot 23: Ka ophis jong ka District Sport Officer ha ryngkat ka jingïatreilang ka ophis jong u Deputy Commissioner lem bad ka District Sport Promotion Society West Khasi Hills, ki la pynlong ïa ka jingïakop pynïamareh ne ka “Meghalaya Day Run 2023” kaba 10 kilometer ha ka sngi saitjaiñ, kum ka dak ka jingrakhe ïa ka Meghalaya Day ne ka jingïoh ïa la ka jong ka Jylla ba pura, ha kaba la wan ban ïa shim bynta da kumba 190 ngut ki shynrang bad 101 kynthei kiba na jan bad na jngai ka sor Nongstoiñ.
Ïa kane ka jingpynïamareh, la kaweh lama da u Deputy Commissioner ka West Khasi Hills District u bah Garod LSN Dykes IAS, kaba la sdang na phyllaw ka ophis DC shaduh Mawïawban bad ban pynkut biang ha DC ophis. Ha kane ka jingkaweh lama la ïa don lang ka kong B.Syiem District Sport Officer, ki coach and staffs na ka Sport Departments bad la pynkut ïa kane ka jingpynïamareh da ka jingsam ïa ki khusnam kaba long da ka khusnam pisa bad certificate sha ki nongjop shynrang bad kynthei.
Ïa ka khusnam ba nyngkong na ka bynta ki shynrang, la ïoh ban rah da u Banjoplang Wanniang, ba ar da u Stephan Sohshang bad ba lai da u Romio Tympuiñ. U Derick Randolf Shangpliang shiphew snem ka rta u la ïoh rah ïa ka nam ‘youngest participant’. La sam ruh sha ki hynniew ngut ki nongjop ïa ka consolation prize.
