Shillong Sports Association 4th Division 2024: Jop ka Umiew Maw U Sam, mar 3 kol ïakhaid ka Thynroit bad ka Madanryting

Shillong, Naitung 13: Ki jingïalehkai ka lympung Shillong Sports Association U-20 Fourth Division 2024 ba la long hynnin ka Sngi Thohdieng ki la jam sha kaba kut ha kaba ka Umiew Maw U Sam SC ka la khur ïa ka jingjop, katba ka jingïakhun hapdeng ka Mawpdang SC bad ka New Challenger SC ka la ïakhaid.
Baroh saw kynhun kiba ïalehkai ha ka Sngi Thohdieng ki dei na ka thup jong ka Group-B, ka Mawpdang SC bad ka New Challenger SC ki la ïasam mar shi point hadien ba ïakhaid da mar 1-1kol.
Ha ka jingïalehkai, dei ka Mawpdang kaba la ïoh lamkhmat nyngkong ïa ka jingïakhun lyngba ka kol na u Mickey Marwein ha ka minit ba 57, hynrei ka jingbakla thep hi jong u Shanbor Swer ha ka 65 minit ka la pynïoh ïa ka New Challenger ban khur ei ïa ka kol pynïakhaid.
Ha ka jingïalehkai kaba bud, ka Mawlyngngad ka la ïoh ban pynkhihjar tang hadien 4 minit ba la ïaid ka por na ka kol u Edelbert Kharmalki hynrei ka Umiew Maw U Sam ka la wanphai da kaba tyngeh ban pynkhihjar ar tylli na u Aiboklang L Nongbri ha ka minit ba 12 bad na u Bilistar Sun ha ka minit ba 17 jong ka kylla step.
Kumba katto katne por, ha ka 43 minit, u Banskhem Kharkongor u la lah ban pynïakhaid biang na bynta ka Mawlyngngad hynrei shah pynkthang ha ka kol u Eller C Allya shuwa ban kut artad ka jingïalehkai (70’+2) kaba la wanrah jingjop sha ka Umiew Maw U Sam.
Ka Umiew Maw U Sam mynta ka la ïoh ban khur pura 9 point bad ka la thikna ban wan hakhlieh duh na ka group bad ruh ban ïohrung sha ka wat ïakhun pre-quarterfinal.
Haba phai pat sha ka jingïalehkai kaba long hynne ka Sngi Saitjaiñ (13 tarik Naitung, 2024) ha ka por 4 baje nohphaisngi ha madan MFA Turf, la sakhi ïa ki ar kynhun , ka Thynroit SC bad ka Madanryting SC kiba la ïakhaid mar 3 kol.
Ka jingïakhun hapdeng kine ki ar kynhun ka la long shisha kaba itynnat ha kaba baroh arliang ki la ïoh marïabiang ki kabu ban pynkhihjar.
Ka Madanryting SC ka la pynkhihjar nyngkong tang hadien 3 minit ba la ïaid ka por na u Bankyrshan Ryndong hynrei ka Thynroit SC ka la pynïakhaid noh ha ka minit ba 8 na u Arphrangstone Warlarpih.
Ha ka minit ba 25 ka Madanryting ka la ïoh biang ban lamkhmat ïa ka jingïalehkai lyngba ka kol u Arky Kshiar, bad pynbud sa ïa ka kol kaba lai ha ka 29 minit na u Banbunlang Thabah.
Na ka liang jong ka Thynroit SC kam shym la kynrandien satia na kane ka jingïakhun, bad dei ha ka minit ba 40 ba u Arphrangstone Warlarpih u la pynphai ïa ka kol kaba ar kaba la ai mynsiem ïa ka kynhun shuwa ban kan ïoh pynïakhaid ha ka khyllipmat shuwa ban wai na u Charlas Nongrum(70+2 min).