Shillong, Naitung 13: Ka Shillong Lajong FC kan sdang ïa ka lynti ïaid jong ka ha ka lympung Durand Cup 2024 pyrshah ïa ka kynhun na Nepal, ka Tribhuvan Army FC ha ka 02 tarik u Nailar ha JN Stadium, Polo.
Kumba la pyntip, baroh ki jingïalehkai jong ka Group F yn pynlong ha nongbah Shillong, kaba dei ka jaka ba thymmai ban ïoh pynlong ïa kane ka lympung. Kane ka jingïalehkai kaba sdang kan long ruh ka jingplie pyrda ïa ka JN Stadium, kaba dang don mynta hapdeng ka jingpynbha. Kiwei pat ki kynhun ba don ha kane ka Group ki kynthup ïa ar tylli ki kynhun Indian Super League, ka FC Goa bad ka Hyderabad FC.
Katba ïa ka jingïalehkai sdang jong kane ka lympung kan long ha ka 27 tarik mynta u Naitung hapdeng ka lahduh ba ïada ïa ka burom, kata ka Mohun Bagan pyrshah ïa ka Downtown Heroes FC.
Ha kane ka sien pynlong kaba133 sien yn sakhi ïa 24 tylli ki kynhun ISL, I-League, Indian Army ryngkat bad ar tylli ki kynhun na bar ri, na Bangladesh bad Nepal.
Ka Lajong, kaba dei kawei na ki kynhun I-League ka la ïashimbynta ha u snem ba ladep hynrei khyllem tang ha ka group stage naba rem ar sien bad jop shi sien.
Kane ka tournament kan ïaid katkum ka round-robin league format ryngkat bad ka knockout stage kaba bud hadien, ka ban sa pynkut ha Kolkata, ha Salt Lake Stadium. Haduh kaba kut jong ka lympung, ki jingïalehkai kin long baroh 43 tylli, bad ki kynhun ba wan hakhmat duh na ka Group, ryngkat bad ar tylli ki kynhun kyrdan ba ar ba kynsai kin ïohrung sha ka wat ïakhun knockout.
Ki jingïalehkai na ka Group F ki ban long ha JN Stadium, Polo-Shillong:
2 tarik Nailar – Shillong Lajong FC pyrshah ïa ka Tribhuvan Army FC, 4PM
5 tarik Nailar – FC Goa pyrshah ïa kaHyderabad FC, 7PM
8 tarik Nailar – FC Goa pyrshah ïa ka Tribhuvan Army FC, 7PM
10 tarik Nailar – Shillong Lajong FC pyrshah ïa ka Hyderabad FC, 4PM
13 tarik Nailar – Hyderabad FC pyrshah ïa ka Tribhuvan Army FC, 7PM
17 tarik Nailar – FC Goa pyrshah ïa ka Shillong Lajong FC, 7PM
