Khliehriat, Nailur, 26: Ka Khasi Students’ Union (KSU) East Jaiñtia Hills District Unit lyngba ka Education Cell ka pynpaw ka jingsngewkhia kaba jur hadien ba ka la ïoh pdiang ïa ka jingujor na ki katto katne ki nongshong shnong jong ka shnong Rymbai ba ym don nonghikai Science mynta lah shi snem kynthih hapoh Rymbai Government Secondary School, kata naduh ba ka sorkar ka la pynkynriah kam ïa ki nonghikai kiba ju don ha katei ka school, hynrei haduh mynta kam pat lah ban thung bujli da kiwei pat ban long nonghikai ba pura.
Na ka liang ka Seng ka la ong ba kane ka la wanrah ka jingduh nong kaba khraw bha ïa ki khynnah skul khatam ki ban pynkhreh ïa ka eksamin matrik ne SSLC. Kumta ka seng ka kyntu jur ïa ka tnat ba dei peit ba kan shimkhia mardor halor kane ka kam khnang ba ki khynnah pule ha katei ka skul kin ïoh ïa ka jingmyntoi ba pura, kata khamtam ha kaba ïadei bad ki khynnah ki ba pynkhreh ïa ka eksamin matrik.
Ha kajuh ka por ka Seng ka pynpaw ruh ka jingsngew bynñiaw ba ki khynnah jong katei ka skul ki la duh noh ïa jinghikai ha ka Science tang na ka daw ba ka tnat pule puthi ka sorkar jylla kam shym la shim khia satia khamtam ïa ki skul kiba don shabar ki jaka sor.
Ha kajuh ka por ka Seng lyngba une u kyrwoh ka pynpaw ruh ka jingsngewkhia kaba jur hadien ba ka la lap ba ki kamra klas ruh kilong khapngiah shaba palat pud bad kaba la buh jingeh shibun ïa ki khynnah skul.
Kumta na ka liang ka seng ka kyntu jur ïa ka sorkar ba ka dei ban shimkhia mardor ban pynbiang ïa ki nonghikai ha baroh ki subject bad ruh ba ki kamra klas ki dei ban long kiba kylluid.
Shuh shuh ka Seng ka kyntu ruh ïa ka sorkar ba ka dei ban kyntiew kyrdan noh noh ïa kane ka school sha Higher Secondary School namar haduh mynta ym pat don Higher Secondary School hapoh ka thaiñ East Jaiñtia Hills, bad na ka liang ka seng ka tip ba ka la don ka jingtyrwa ne proposal kumba 3 snem mynshwa bad ka daw ka long ba ym pat tei ïa ka building.
Hynrei kumba ka long mynta ka seng ka la shem ba kane ka building la jan dep ban shna bad kumta ka sorkar ka dei ban phaikhmat ban kyntiew kyrdan noh mardor ïa kane ka Skul sha ka kyrdan Higher Secondary School.
