Nongstoiñ, Rymphang 05: Na ka bynta ka jingmyntoi jong ki paitbah ka Mawshynrut Civil Sub Division, ki nongïalam ka Mawshynrut Youth Movement ha ka sngi thohdieng ba la dep ki la ai da ka Memorandum sha u Conrad Kongal Sangma Myntri Rangbah ka jylla.
Ki nongïalam ka Movement ki la leit ban ïakynduh ïa u Myntri Rangbah hadien ba u la dep ban plie ïa u mawnongrim ban pynbha ïa ka madan phutbol ha Riangdo Ha katei ka jingleit ïakynduh, ki la ïoh ruh ban ïakren bad ban aiti ïa ka memorandum kaba la soi da u bah Shem Rynñiaw President bad u bah P.Wanñiang secretary, ha kaba ki la pynkynmaw ha u Myntri Rangbah ïa ki mat kiba don kam eh kum ka jingpyntrei noh ïa ki tnad treikam hapoh ka Civil Sub Division kum ka planning, border, housing, Supply, MPSC bad DSC bad ban thung noh ïa ki nongtrei ba pura ha baroh kitei ki tnad trei kam.
Nalor kitei ki mat la pynkynmaw ruh ba ka Mawshynrut Civil Sub Division ka la don kam la u jong u Sub Divisional of School Education Officer, namar ka area ka long kaba ïar kaba don haduh lai spah khat hynriew tylli ki shnong, palat arspah sanphew tylli ki L.P Skul, sawphew hynriew tylli ki Upper Primary skul, arphew saw tylli ki Secondary skul, lai tylli ki Higher Secondary school. Dei halor ka jingdon jong kat kitei ki skul ba ka MYM ka hap ban pynkynmaw ïa u Myntri Rangbah ba un shim khia.
Ha dorkhas ka seng ka la pynkynmaw ruh ba ïa ka Riangdo CHC la I dei ban kyntiew sha ka shispah jingthiah namar katba nang mih ki snem ka jingroi briew ka la nang kiew sted bha. Nalor kata ha ka CHC kaba don mynta ka dang donkam shuh shuh ki nongtrei nalor ki Doktor, GNM, ANM.L.T chowkidar bad kiwei kiwei bad ban pynbiang ruh ïa ki kor x-ray, ambulance bad kali kit met ïap.
Shuh shuh la pynkynmaw ruh ha katei ka jingthoh ba ka sorkar ka la dei ban kytiew kyrdan noh ïa ka Seiñduli, Umsohpieng, Umdang, Riangdim bad Missei Sub Health Centre sha ki Primary Health Centre na ka bynta ka jingbit jingbiang jong ki paitbah nong shnong shnong.
Kiwei pat ki mat jingdawa lyngba katei ka jingthoh ki long ba ka sorkar ka mang pisa na ka bynta ban seng da ka College hapoh ka Civil Sub Division, namar ka dei ka jaka pdeng jong ka pule puthi jong ki paitbah ka thaiñ Lyngngam bad Garo.
Kiwei pat ki mat ba ka seng ka la pynkynmaw ki long ka jingpyntreikam pura ïa ki tnad treikam kiba la dep don lypa kum ka tnad PHE, Water Resources, Sub Treasury bad Agriculture.
Shuh shuh la pynkynmaw ba ka sorkar kan pyntrei kam pura noh ïa ka Rimuliang bad Shahlang C&RD Block, ba ka sorkar kan mang pisa na ka bynta ban ïada ïa ka jingtwa khyndew ha shilynter ka wah Riangdo, ki jaka ai jinghikai na ka bynta ban ri jingri, ri dohkha, ban ai jingïarap ban ïada ïa ki lynkha kba ha Wahblei na ka jingshlei um.
La pynkynmaw ruh ba ka la donkam eh ban thung noh da u Veterinary Officer u ba pura ha Riangdo, khnang ba ki paitbah nongri jingri kin ïoh jingmyntoi lada ki jingri jigduh ki kem pang.
