U Bah Justin Sun katto katne snem mynshuwa u la rwai ïa kawei ka jingrwai shaphang ka khwai dohkha bad kane ka jingrwai ka kren shaphang ka jingbym ngat ba leit khwai na damsite, Umïam. Kadei ka jingrwai kaba ïaid ïew bha badki briew ki ju sngewtynnad ban sngap.
Lada ka jingrwai u Bah Sun ka kren ïa ka jingbym ngat u nongleit khwai, mynta ka khwai dohkha ka la shah kynshi da kawei pat ka rukom bad kata ka long ba ka khwai dohkha mynta, khamtam eh ka khwai pung, ka la kylla long ka tamasa ïathong kaba ka pisa ka poi da ki phew lak tyngka bad poi klur ruh imat.
Ha ki por kiba mynshuwa ka khwai la ka long ka khwai wah ne ka khwai pung, ka por ban pynpyngngad jabieng ka long kum ka jingkilan met, ha kaba wat ki kynthei ruh ki sngewtynnad ban leit khwai. Ka khwai pung ka dei ruh ïa ki briew ki bym da nang bha ban leit khwai, namar ka khamsuk ban khwai. Mynta pat ka khwai pung ka la kylla long ka jaka ïathong ba ka jaka khwai pisa ym shuh ka khwai dohkha.
Ñiuma ym lah ban khang ïa kata ka ïakop khwai competition, namar kaba kum kane ka rukom khwai ka la ju don naduh ki por ba mynshuwa. Hynrei ka jingïapher ka khwai compettion mynta bad ka khwai competition mynta ka long ba ka khwai mynta ka la long kum ka kam ïakhalai kaba ka pisa ka la bun bad ka bai rung ruh ka la heh. Mynshuwa kiba leit sahmiet sha jaka khwai dei tang kito kiba leit sha ki wah kiba jngai, hynrei mynta kiba khwai ha ki pung kiba don hajan ruh ki la wan sahmiet lypa namar ba ïoh duh jaka.
Nangta ha kano ka rukom ruh, ka khwai ka poi ruh sha ka jingïathong khalai nusip ban thoh da ki ticket bad sa pynkhalai. Kiba pynlong khalai nusip ki hap ban siew ïa khajna sha ka sorkar kum ka thoh tim bad kiwei kiwei. Ym tip la ka sorkar ka tip ne kam tip ïa kane ka jingpynkhalai nusip kaba ka prais ka long da ki kali rem dor jong ka juk mynta.
Hynrei napdeng kine kiei kiei baroh kaba kham sngewkhia eh na ka jingkhwai kaba mynta ka long ka jingthut ka leit ka wan. Ka jingjia kaba la jia ha Pamphyrnai ha surok National Highway ban leit sha Nongstoiñ kam dei kaba ka sien kaba nyngkong, hynrei ka jingsahkut kali ha ki jaka ba pynlong ïakop khwai ha ki Pung kadei kaba la jia bunsien bad kane ka mih namar ba kiba wan khwai ki wan na kylleng kylleng ba ki pynïeng ïa ki kali harud surok, khlem pyrkhat shuh ba kane ka jingleh jong ki kan ktah ïa ki paidbah nongleit nongwan. Kaba sngewsih eh kumba ka la jia ha Pamphyrnai, kadei ka jingkhlad noh i khunlung ba dang kha namar ka jingbymïoh lad ka kmie ban leit kha ha Hospital.
Ki trai pung ne ki briew ba wai pung ban pynlong ka jingïakop khwai kim pyrkhat ha kano ka rukom ban pynïaid ba ki kali kim nym pynthut ïa ka leit ka wan ki paidbah. Ka jingkhapngiah ne ka jingsahkut kali ka jia khamtam ha ka por ba pynlong ïa ka jingkhalai nusip kumba ka la jia ha Pamphyrnai, ha kaba ki paidbah kim salia shuh mano ba sahkut kali ha surok namar ba la la ïa muja ka sngap result khalai nusip.
U DC jong ka South West Khasi Hills District, hadien ka jingjia ha Pamphyrnai u la pynjari da ka Section 144 CrPC ha kaba u la mana ban pynlong ki jingïakop khwai ha ki Pung kiba don 500 meter na surok. Kane kadei ka sien jam kaba biang eh ban khanglad ïa ka jingïohmon ki nongwankhai ban pynthut ïa ka leit ka wan ki paidbah. Ha ki snem baladep ruh u DC ka Eastern West Khasi Hills District u la mana ban pynlong ki jingïakop khwai kiba palat 1 lak tyngka ka prais, hynrei imat kane ka hukum ka la kut noh namar la ïohi ba ha kane ka District ki la ïaid biang ki jingïakop khwai kiba palat 1 lak tyngka ka prais.
Ka jingjia ha Pamphyrnai kadei ban long ka jinghikai ïa baroh, ba ki bor synshar District kidei ban kyndit thiah bad kim lah shuh ban shu kynnoh tang ïa ki nongpynlong khwai, hynrei ki la dei ban shim ka jingkitkhlieh haba don ki jingjia kumba la jia ha 16 tarik u Nailur 2023, namar lada kim lah ban teh lakam, khlempep kaba kum kato ka jingjia ka kan poi sha kaba kham sniew shuh shuh.
