Shet kylla ka VPP ïa u kyrtong ba la dep ai tiket na Nongstoin ai sha u Dr Jurist

Shillong, Kyllalyngkot 7 : Khatduh khatwai ka jingshisha ka paw pyrthei wat la ha kaba sdang u President ka VPP u bah Ardent M Basaiawmoit u la kynnoh ba ka jingmih khubor ha ka Batesi TV kam dei ka khubor hynrei ka dei ka khana lorni hynrei mynta ka sngi la paw ba ka VPP ka la shet kylla ia u kyrtong uba ka la dep pynbna bad ai tiket ban ïakhun ïa ka Election MDC na Nongstoin u bah Marbiang Nongsiej namar ka la pynduh tiket noh ïa u bad ai sha u Dr Juristman Iawphniaw.
Kane ka jingpynduh tiket noh ïa u bah Marbiang Nongsiej ka long kat kum ka Notification ba la pynmih mynta ka sngi 7 tarik Kyllalyngkot 2025 na ka ophis jongka VPP ba la soi da u Secretary ka State Election Committee ka VPP u Dr Londoner M Sohtun. Ha ka jaka jong u bah Marbiang Nongsiej la ai tiket noh ïa u Dr Juristman Iawphniaw.
Dang kumba ar taiew mynshuwa, ka Batesi TV ka la pynmih ïa ka khubor ba u kyrtong jong ka Voice of the People’s Party u ban ïa khun ïa ka elekshon MDC sha ka Khasi Hills Autonomous District Council na Nongstoin konstitwensi u bah Marbiang Nongsiej u lah ban shah pynduh tiket noh ha ka Party jong u ka VPP.
Kane ka khubor ka la pynbitar lep ïa u President rangbah jong ka VPP u bah Ardent Miller Basaiawmoit, uba la thoh syndon ha ka Whatsapp Status jong u da kaba ong ba ka Batesi TV ka dei ka Fake News lane ka khubor thok bad ka jingmih khubor kam dei ka khubor hynrei ka dei ka khana lorni bad u la kynthoh ruh da kaba ong ba ka dei ka Paid News lane ka lad pathai khubor ba la siew pisa dano re dano.
Hynrei mynta kane ka khubor ba ka Batesi TV ka la dep ban pyllait kham mynshuwa ka la urlong bad da shisha u kyrtong ka VPP na Nongstoin u la shah pynduh tiket bad ïa ka tiket mynta la ai sha u Dr.Juristman iawphniaw. Hato haba kumne mano ba shukor ïa ki paidbah ym dei u bah Ardent namar u la shu kynnoh ïa ki lad pathai khubor ba ki shu lorni bad ki shah thied pisa. Ka VPP ka la pynbna ïa kane ka jingbujli kyrtong ha ka 7 tarik u Kyllalyngkot 2025 bad ïa kane ka jingpynbna la soi da u Secretary jong ka State Election Committee u Dr.Londoner M Sohtun.
Kum ban shu pynkynmaw ba ha ka Whatsapp Status jong u bah Ardent u la byrngem ruh ba un tan ïa ka Batesi Tv sha ka Press Council of India da kaba kynnoh ba ka ai khubor thok hynrei mynta kine ki jingshisha kiba ki nonglum khubor ki la ïoh ki la paw pyrthei bad ka la urlong shisha.
Ki lad pathai khubor kim dei kiba don ha kano kano ka liang hynrei ki thoh bad ki pynmih ïa ki khubor katkum ki jingtip kiba ki la ïoh lum bad ka shong ha ki paidbah mynta ban bishar , hato ka dei ka jingbakla jong ka Batesi Tv ne ka dei ka jingpyrshang jong u President ka VPP ban ïalam bakla ïa ki paidbah lyngba ka jingthoh Status jong u.