Shillong, Rymphang 05 : Ka sorkar jylla ka lah ban shim noh shen ïa ka rai kaba khatduh ban thung ïa ka chairperson ba thymmai jong ka Meghalaya State Commission for Women (MSCW) la kumno kumno hapoh kane ka taiew.
Haba pyntip ïa kane, u Myntri ka tnad Social Welfare, Bah Paul Lyngdoh ha ka sngi Nyngkong u la ong ba u la dep ruh ban bishar bniah ïa ki ishu kiba ïadei bad ka tnad.
La iathuh ruh ba la pyntip ïa u ba nalor ki saw tylli ki kyrteng kiba la tyrwa bad ai jingmut da ka Search Committee, la ïoh pdiang ruh sa ar tylli kiwei pat ki jingtyrwa.
“Ia kane ngin sa shim rai khatduh hapoh kane hi ka taiew namar ka tarik ba khatduh ban phah ïa kitei jingtyrwa ka la dep kut,” u la ong.
Haba jubab halor ka jingkylli, u Myntri u la ong, “Ngi kwah ïa ka rukom treikam kaba khuid bad kumta ban ailad lang ïa baroh ngi la ong ba ngin ailad shuh ia kiwei nalor ki kyrteng kiba la dep ban tyrwa da ka search committee bad dei na kane ka daw ngi la pynbna paidbah (advertisment) ban pan ïa ki jingtyrwa na kito ki kyrtong kiba kwah bad dei na kane ba ngi la ïoh pdiang sa ar tylli ki kyrteng.”
