Shen yn sdang pynkynriah noh ïa ki Harijan ba sah ha Them Metor

Shillong, Rymphang 20: Ka Sorkar Jylla kan sa pynkynriah noh shen ïa ki paid Harijan ba sah ha Them Metor hadien ba ka Shillong Municipal Board (SMB) kala dep pynkynriah ïa ka Ophis treikam na ki Quarter sha ka Ophis ba shipor.

Kat kum ka khubor ba iajan bad ki Ophisar ka SMB, ka jingpynkynriah ïa ka ophis jong ka Board na ki Quater sha ka Ophis ba shipor kan sa dep noh hapoh ka artaiew.

Kila pyntip ba kin sa phah ïa ka jingtyrwa sha ka Sorkar Jylla ban mang pisa na ka bynta ban pynbha/maramot noh ïa ki quarter khnang ban ïoh pynsah ïa ki nongtrei jong ka Board.

Kila pyntip ba ka Tnad Pynroi Sor kan hap ban pynmih da ka hukum ïa ki Nongtrei ba sah ha Them Iew Mawlong ba ki dei ban kynriah noh sha ki Quarter.

“Ka Tnad Pynroi Sor kan hap ban pynmih ïa ka hukum ha kaban pynkynriah ïa ki Nongtrei ka SMB bad ki Nong trei jong kiwei kiwei ki Tnad namar ka Tnad Pynroi Sor kala long trai ïa ka jaka ha Them Metor” kila ong.

Kat kum ka jinglum jingkheiñ jong ka Shillong Municipal Board, haduh 184 ngut ki Nongtrei bad ki bahaïing hadem ki dei kiba la ithuh kum ki nongshongshnong ka Them Metor ba da ïoh jingbit. Kine ki kynthup ïa 128 ngut ki Nongtrei ka SMB bad 56 ngut kiba trei ha kiwei kiwei ki Tnad Sorkar.

Ha ka 29 tarik Risaw 2020, ka Sorkar Jylla kala shimti ïa ka jinglong trai ïa ka jaka ha Them Metor hadien ka jing siew ïa ka song pisa ba T. 2 klur sha u Syiem ka Hima Mylliem, da ka jingthmu ban pynkynriah noh ïa ka Them Metor. Ka jingshimti ïa kane jaka kaba heh kumba 12,444.13 sqm ka long kat kum ka lease deed (soskular aiwai) ba la ïasoi ha ka 31 tarik Lber 2021.

Kane ka soskular aiwai la ïasoi hapdeng ka Sorkar Meghalaya, u Syiem ka Hima Mylliem bad ka Shillong Municipal Board. Kane kala urlong ruh hadien ba ka Sorkar Jylla kala rai ban pyntreikam ïa ka jingai jingmut jong ka High Level Committee (HLC) kaba la aiti ïa ka kaiphid ha ka 28 tarik Nalur 2021.

Ki lai tylli ki jingai jingmut ba hakhmat eh jong ka HLC ka dei ka jingshimti noh ïa ka hok longtrai ïa ka Them Iew Mawlong, ka jingpynkynriah ïa ki Nongtrei Sorkar bad pynkynriah noh ïa ki briew ba shong be-aiñ.

Lah ban kdew hangne ba ïa ka HLC la thaw da ka Sorkar Jylla ban wad ïa ki lad ki lynti ha kaban pynkynriah noh ïa ka Them Metor na Them Iewmawlong hadien ka jingkulmar kaba jia ha u snem 2018.

Na ka liang ka Harijan Panchayat Committee (HPC) kala kyntait ban pdiang ïa ka kaiphod jong ka HLC bad kut jingmut ban ïakhun pyrshah ïa kane ka kam be-aiñ jong ka Sorkar.