Shen yn sdang biang ka jingïapynbeit pud hapdeng ka Meghalaya bad Assam ong u ma Lahkmen

Shillong, Nailur 07: U MLA jong ka Amlarem Constituency bad u Chief Adviser jong ka sorkar jylla u Ma Lahkmen Rymbui ula ong, ka sorkar ka don ïa ka jingthmu ban sdang biang ïa ka jingïakren na ka bynta ban pynbeit ïa u pud u sam hapdeng ka jylla Assam bad Meghalaya.
Ha kaba ïadei bad ka jingkylli, halor ka rukom treikam ka sorkar jylla ba kan ïakren pynbeit ïa u pud u sam ha ka wat ka baar, u Bah Rymbui uba long ruh u Chairman jong ka committee ka Ri-Bhoi ban pynbeit ïa u pud u sam, ula pynpaw ïa ka jingskhem jingmut ba kane ka jingïakren pynbeit kan ïaid shaphrang bad ruh shen kan sa sdang biang noh.
“Nga dap da ka jingsngewkmen, ba la pyndep ïa ka bynta kaba nyngkong. Hooid, ngim lah ban pynbeit lut ïa baroh ki jingeh, hynrei ïa kiba bun hi ki jingeh la lah ban pynbeit. Nga sngewkmen, ba ka sorkar ka la sdang ïa ka kam na ka bynta ka bynta ban sdang ïa ka jingïakren ha ka wat kaba ar, kumba la pynpaw da u Myntri Rangbah ka Jylla, ba ka jingïakren kan sa sdang noh naduh u bnai Risaw. Ki jingeh kin don namar ban pynbeit ïa kano kano ka jingïakajia ka wan ryngkat bad ki jingeh, hynrei da ka mon jongka kam saiñpyrthei bad ka jingsngewthuh bad ki paidbah ha ki thaiñ khappud, ngi kyrmen skhem ba ngin lah ban pynbeit ïa kane ka jingeh kaba la sahteng la bun snem” ong u Ma Rymbui.
Ha kaba iadei bad ka jingdawa ban khmih bniah biang ïa ka jingïateh ba la ïasoi ha ka wat kaba nyngkong jong ka jingïapynbeit pud, u ma Lakmen Rymbui ula ong, “Ngi hap ban ïakren ïa baroh ki mat kiba baroh ar tylli ki sorkar kila ïa mynjur lang. Ngim lah ban pynsngewbha ne pynhun ïa baroh, hynrei lada don ki jingeh kiba shisha kiba donkam ban bishar biang, ka jingmut jingpyrkhat jong ka sorkar kala long lypa kaba la plie.Hynrei ïa ki jingeh kiba khraw naduh ka wat kaba nyngkong la pynbeit katba lah.”
Katba u Myntri ka sorkar jylla bad u nongïalam ka BJP u Bah AL Hek ula pdiang ïa ka rai ban sdang noh ïa ka bynta kaba ar jong ka jingïakren bad ula ban jur ïa ka jingdonkam ban buh hakhmat eh ïa ki jingmyntoi jong baroh kiba don bynta lang.
“Ngi kwah ban pynbeit noh shi syndon ïa kane na ka bynta jong baroh bad ka ban long shi rta. Khamtam haba ki Myntri Rangbah jong baroh ar tylli ki jylla, kila don ïa ka jingïakren kaba bniah, ka jingmut jong nga, ka long ba dei ban pyrkhat ruh ïa ki trai shnong shwa ban shim ïa ka rai kaba khatduh ha kaba ïadei bad ka jingpynbeit ïa u pud u sam,” ong u Hek.
Haba kylli hato lah ne em ban pynbeit kloi ïa ka jingeh ha khappud, u Bah Hek ula ong, “Lada baroh ar tylli ki jylla ki ïa shong ban ïakren da kaba pyndon bynta lang ïa ki traishnong, lah ban pynbeit ïa ka jingeh. Hangno ka jingeh khlem ka jingpynbeit? Na ka bynta kawei pa kawei ka jingeh, ka don beit ka lad ban ïa pynbeit.”
Ula banjur da kaba ong, “ïa ki mat dei ban ïa pynbeit hapdeng ki artylli ki jylla da kaba shim lang ïa ki jingeh kaba mad da ki nongshong shnong”.
Kum ban shu kdew,u Myntri Rangbah ka jylla u Conrad K. Sangma bad u Myntri Rangbah ka Assam u Himanta Biswa Sarma kin sa sdang biang ïa ka jingïakren pynbeit pud ha u bnai Risaw na ka bynta ban pynbeit noh ïa ki 6 tylli ki jaka kiba don hapdeng ka jingïakajia kaba kynthup ïa ka Langpih, Psiar, Khanduli, Block I bad Block II.